सुकमा, 08 सितमबर 2020। राज्य स्तरीय ऑनलाइन चित्रकला प्रतियोगिता 2020-21 के आयोजन शिक्षा ज्योति पीएलसी समूह महासमुन्द ह करे रहिस। ये राज्य स्तरीय आनलाइन चित्रकला प्रतियोगिता म सुकमा निवासी कुमारी स्नेहा चन्द्राकर ह पूरा प्रदेश म तीसरा स्थान प्राप्त करके सुकमा के मान बढ़ाए हे। कु स्नेहा केन्द्रीय विद्यालय सुकमा म कक्षा सातवीं म अध्यनरत हे। ये प्रतियोगिता के आयोजन शिक्षक दिवस के अवसर म 5 सितमबर के करे गए रहिस।
जानबा हे के कुमारी स्नेहा के माता अउ शिक्षिका श्रीमती चंचला चन्द्राकर ल कोरोना महामारी के समय लइका मन के सरलग पढ़ाईं जारी रखे म स्वैच्छिक रूप ले भागीदारी निभाए अऊ सरलग ऑनलाइन कक्षा लेहे बर स्कुल शिक्षा विभाग छत्तीसगढ़ शासन कोति ले ससम्मान प्रशस्ति पत्र देहे गए हे। श्रीमती चंचला चन्द्राकर सुकमा जिला के शासकीय प्राथमिक शाला जामपारा झलियारास म सहायक शिक्षिका हे। एखर पहिली श्रीमती चंचला चन्द्राकर ल मुख्यमंत्री शिक्षा गौरव अलंकरण पुरस्कार के अन्तर्गत शिक्षा दूत पुरस्कार, इनोवेटिव पाठशाला अऊ विभागीय काम योजना के सम्पादन म उत्कृष्ट काम करे के फलस्वरूप प्रशस्ति पत्र ले घलोक सम्मानित करे जा चुके हे। कलेक्टर श्री चन्दन कुमार ह कुमारी स्नेहा अउ वोखर माता श्रीमती चंचला चन्द्राकर ल बधाई अऊ शुभकामना देवत ऊंखर उज्ज्वल भविष्य के कामना करे हें।
