रायपुर, 8 फरवरी 2021। नगरीय प्रशासन मंत्री डॉ. शिवकुमार डहरिया आरंग विकासखण्ड़ के नवगठित नगर पंचायत चंदखुरी म आयोजित मड़ई मेला म सामिल होइन। ये बेरा म उमन कहिन कि वइसे तो चंदखुरी क्षेत्र के पहिचान पहिलीच ले हे फेर अब नगर पंचायत बने के बाद इहां के पहिचान अऊ बाढ़ जाही। माता कौशल्या के एकमात्र मंदिर होए ले ये क्षेत्र के ऐतिहासिक महत्व हे। छत्तीसगढ़ सरकार कोति ले ये क्षेत्र ल पर्यटन के दृष्टिकोण ले विकसित करे जात हे। मंत्री डॉ. डहरिया ह कहिन कि चंदखुरी अब नगर पंचायत बन गए हे। नगर पंचायत बने ले इहां विकास काम मन म गति आही। शासन कोति ले क्षेत्र के विकास बर राशि के अकतहा व्यवस्था कराए जाही। नगर पंचायत के काम मन के संचालन बर चंदखुरी म अध्यक्ष अऊ अधिकारी मन के पदास्थापना होए हे। ये बेरा म चंदखुरी के मनखे मन ह मंत्री डॉ.डहरिया के भव्य स्वागत करिन। मनखे मन ह चंदखुरी ल नगर पंचायत बनाए म मंत्री ल बधाई देत आभार घलोक जताइन।
उमन कहिन कि मड़ई मेला के माध्यम ले सरकार ह छत्तीसगढ़ के संस्कृति ल सहेजे के काम करत हे। छत्तीसगढ़ी संस्कृति ल बढ़ावा देहे के संग इहां के तीज-तिहार मन म शासकीय अवकाश देहे के शुरूआत करे गए हे। शासकीय नौकरी म घलोक स्थानीय मनखे मन ल अवसर देहे जात हे। उमन कहिन कि गांव म मड़ई मेला उमंग के तिहार होथे। गांव के मनखे आपसी-भाईचारा के बीच ये मेला ल आयोजित करथें। अइअइसन आयोजन गांव म होत रहय अऊ आप मन सबो माता कौशल्या के नगरी म सुख-शांति ले रहयं इही कामना हे।
मंत्री डॉ.डहरिया ह कहिन कि छत्तीसगढ़ राज्य अब तक के सबले जादा धान बिसाए हे। उमन कहिन कि मुख्यमंत्री के सियानी म प्रदेश म विकास के काम होवत हे। बिजली बिल घलोक हाफ करे गए हे। स्थानीय बेरोजगार मन के भर्ती घलोक शुरू कर देहे गए हे। 36 म ले 24 वादा पूरा कर देहे गए हे, लऊहे बांचे वादा मन ल घलोक पूरा करे जाही। ये बेरा म श्री रविशंकर धीवर, अध्यक्ष, सरपंच श्रीमती मालती धीवर, श्री दिनेश ठाकुर पूर्व जनपद अध्यक्ष, गालव साहू, सौरभ चंद्राकर, उत्तम देवांगन, पार्वती निषाद, देवेन्द्र वर्मा, भारत भूषण साहू आदि उपस्थित रहिन।
नगर पंचायत चंदखुरी के मड़ई मेला म संघरिन मंत्री डॉ. डहरिया
