मुख्यमंत्री ह स्वर्गीय श्री चंदूलाल चंद्राकर के पुण्यतिथि म ओ मन ल करिन नमन

रायपुर, मुख्यमंत्री श्री भूपेश बघेल ह छत्तीसगढ़ के प्रखर पत्रकार अऊ पूर्व सांसद स्वर्गीय श्री चंदूलाल चंद्राकर के 2 फरवरी के पुण्यतिथि म ओ मन ल नमन करे हें। श्री बघेल ह श्री चंद्राकर के अमूल्य योगदान ल सुरता करत कहिन कि चंदूलाल जी कई बार लोकसभा म सांसद निर्वाचित होइन। उमन कई महत्वपूर्ण विभाग मन के मंत्री पद के दायित्व संभालत देश अऊ प्रदेश के विकास बर महत्वपूर्ण काम करिन। छत्तीसगढ़ राज्य निर्माण सर्वदलीय मंच के अध्यक्ष के रूप म उमन छत्तीसगढ़ राज्य आंदोलन ल नवा दिशा प्रदान करिन।
मुख्यमंत्री श्री बघेल ह कहिन कि चंदूलाल जी मूल्य आधारित निष्पक्ष अऊ निर्भीक पत्रकारिता बर घलोक जाने जाथें। ओ मन राष्ट्रीय स्तर के संपादक घलोक रहिन। कई ज्वलंत मुद्दा मन म उमन निडरता ले अवाज उठाईन। उमन अपन प्रखर व्यक्तित्व अऊ निर्भीक पत्रकारिता ले देश म छत्तीसगढ़ के नाम रोशन करिन। राज्य सरकार ह उंखर सुरता म पत्रकारिता के क्षेत्र मे चंदूलाल फेलोशिप स्थापित करे हे, जेखर से मूल्य आधारित पत्रकारिता ल बढ़ावा मिलय। मुख्यमंत्री ह कहिन कि छत्तीसगढ़ के माटी पुत्र चंदूलाल जी के मातृभूमि के प्रति सेवा भावना, ऊंखर अमूल्य विचार नवा पीढ़ी ल हमेशा प्रेरित करत रइही।