01 ले 07 जून तक मनाए जाही “चांउर तिहार”, राशनकार्डधारी परिवार ल एकमुश्त मिलही तीन महिना के चांउर

रायपुर, छत्तीसगढ़ म अवइया 01 ले 07 जून 2025 तक ‘चांउर तिहार’ आयोजित करे जाही। ए तिहार के समय प्रदेश के 81 लाख ले जादा राशनकार्डधारी परिवार ल जून, जुलाई अउ अगस्त तीनों महिना के चांउर एकमुश्त देहे जाही।
राज्य शासन ह ए उद्देश्य ले प्रदेश के 13,928 उचित मूल्य दुकान मन ल चांउर के आबंटन जारी कर देहे हे। सबो दुकान म चांउर के भण्डारण काम तेजी ले चलत हे ताकि वितरण म कोनो प्रकार के बाधा झन आवय। ए पहल ले दूरस्थ अऊ ग्रामीण अंचल तक समय म खाद्य उपलब्धता सुनिश्चित करे जा सकत हे।
राज्य खाद्य, नागरिक आपूर्ति अउ उपभोक्ता संरक्षण विभाग द्वारा  जारी निर्देश के मुताबिक, 1 जून ले 7 जून तक चांउर तिहार के समय सबो उचित मूल्य दुकान ले चांउर के वितरण सुनिश्चित करे जाही। ए अवसर म दुकान म वितरण संबंधित जानकारी के प्रदर्शन अनिवार्य करे गए हे।
सबो जिला के कलेक्टर मन ल निर्देशित करे गए हे कि चांउर वितरण के सूचना स्थानीय स्तर म प्रचार माध्यम ले व्यापक रूप ले प्रसारित करे जाय, जेखर से हर एक लाभार्थी तक ये जानकारी सुगमता ले पहुंचय अऊ वितरण पारदर्शी रहय।
खाद्य विभाग के सचिव श्रीमती रीना बाबासाहेब कंगाले ह चांउर तिहार के तैयारी बर वीडियो कॉन्फ्रेंस के माध्यम ले सबो जिला कलेक्टर मन, खाद्य अधिकारी मन अउर नागरिक आपूर्ति निगम के जिला प्रबंधक मन के संग समीक्षा बैठक म निर्देश दीन के हर एक उचित मूल्य दुकान म समय ले पहली चांउर के समुचित भण्डारण सुनिश्चित करे जाए। चांउर के वितरण दुकान स्तर के निगरानी समिति के उपस्थिति म होवय, अऊ हर एक लाभार्थी ल ई-पॉस मशीन से बायोमैट्रिक प्रमाणीकरण के बाद ही चांउर प्राप्त होवय। संगेच लाभार्थि ल वितरित चांउर के पावती रसीद अनिवार्य रूप ले देहे जाय।
खाद्य सचिव श्रीमती कंगाले ह कहिन कि ए पूरा प्रक्रिया के उद्देश्य पारदर्शिता, जवाबदेही अऊ लाभार्थी के सुविधा ल सुनिश्चित करना हे। विभाग कोति ले तकनीक के प्रभावी उपयोग घलोक सुनिश्चित करे जात हे।
मानसून के समय प्रदेश के 249 अइसन उचित मूल्य दुकान, जेन वर्षा ऋतु म पहुंचविहीन हो जाथे, ऊंखर बर घलोक विशेष तैयारी करे गए हे। जून महिना म ही ए दुकान मन म अग्रिम चांउर भण्डारण के कार्यवाही पूरा करे के निर्देश देहे गए हे, ताकि वर्षाकाल म घलोक राशन वितरण सरलग होवत रहय।
बैठक म नागरिक आपूर्ति निगम के प्रबंध संचालक श्रीमती किरण कौशल अऊ खाद्य विभाग के संचालक श्री रमेश शर्मा उपस्थित रहिन। एकर संग सबो जिला मन के कलेक्टर, खाद्य नियंत्रक, जिला खाद्य अधिकारी अउ जिला प्रबंधक, नागरिक आपूर्ति निगम घलोक वीडियो कॉन्फ्रेंस के माध्यम ले सामिल होइन।