अंत्यावसायी परिसर म कांच गलाए के भट्टी के होइस उदघाटन
रायपुर, रंग-बिरंगी चुड़ी मन के निर्माण क्षेत्र म अब कोण्डागांव जिला के महिला मन अपन कौशल देखाहीं। जिला के महिला मन ल आत्मनिर्भर अऊ स्व-रोजगार ले जोड़े बर करीबन एक साल पहिली नवाचारी पहल करत चुड़ी डिजाईनिंग के काम जिला प्रशासन कोति ले चालू करे गए रहिस।
चुड़ी निर्माण के काम इहां के महिला मन बर एक नवा क्षेत्र हे। जिला कलेक्टर नीलकंठ टीकाम के विशेष प्रयास ले जिला म डिजाईनर चुड़ी मन के प्रशिक्षण केन्द्र चालू करे गए हे। इही कड़ी म आज चुड़ी निर्माण के जरूरी रॉ-मटेरियल कांच गलाए के भट्टी के शुभारंभ जिला कलेक्टर के उपस्थिति म करे गीस। एखर बर विशेष प्रशिक्षित कारीगर मन के मार्गदर्शन म महिला मन ल चुड़ी बनाए के प्रशिक्षण देहे जाही।
सोसायटी के प्रशिक्षक महिप सिंह ह बताइस कि महिला मन ल ये काम बर रॉ-मटेरियल संस्था कोति ले उपलब्ध कराये जाही अऊ ये काम म लगे महिला मन रोजेच तीन सौ ले चार सौ रुपिया के कमई कर सकहीं।
कलेक्टर ह कहिन कि घर परिवार के देखभाल के बाद बांचे समय के उपयोग ल कहूं महिला मन आर्थिक गतिविधि म लगाहीं त ओ मन महिला सशक्तिकरण के मिसाल बन सकत हें। अइसनहेच अभी हाले म महिला समूह ल सीमेंट पोल, ईंट निर्माण, तार फैंसिंग अऊ टाईल्स निर्माण के क्षेत्र म घलोक अवसर उपलब्ध कराये जात हे।