60 किसान मन ल अब सालभर मिलत हे खेती बर पानी, नलकूप मन के जलस्तर म घलोक अच्छा सुधार
जल संवर्धन बर मनरेगा के तहत जीरानाला म बनाय गए हे 7 चेक-डेम
रायगढ़, 11 जुलाई 2020। मनरेगा (महात्मा गांधी राष्ट्रीय ग्रामीण रोजगार गारंटी योजना) ले ग्रामीण परिवार मन ल सीधा रोजगार मिले के संगेच परिसंपत्ति निर्माण, आजीविका संवर्धन अऊ प्राकृतिक संसाधन मन ल सहेजे के काम घलोक होवत हे। खेती-किसानी ल भरोसेमंद अऊ जादा लाभ के व्यवसाय बनाए बर व्यक्तिगत कुवां अउ डबरी मन के निर्माण के संगेच सामुदायिक स्तर म घलोक जल संवर्धन के काम ले सिंचाई के साधन विकसित करे जात हे। एखर से जलस्रोत मन के जलस्तर म सुधार आए के संगेच जमीन के क्षरण घलोक रूके हे।
मनरेगा के अंतर्गत रायगढ़ जिला के जीरानाला म बनाय गए सात बोल्डर चेक-डेम मन ह 62 किसान मन के खेती के तौर-तरीका ल बदल देहे हे। पहिली केवल बरसात के मौसम म ही वो बोहात दिखए अब बारिश के पहिली अऊ बाद घलोक वो जीवंत दिखथे। एखर से जीरानाला ले सटे 75 एकड़ खेत मन म अब सालभर फसल लहलहावत हे। चेक-डेम मन के निर्माण के बाद नाला म बहुत पानी रूके ले किसान मन धान के बाद सब्जी के खेती तको करत हें। धान के बनेच पैदावार के संग सब्जी उत्पादन ले घलव ओ मन ल बने आमदनी होवत हे।