चेन्दरू मंडावी के आदमकद प्रतिमा के होही स्थापना

जगदलपुर, बस्तर विकास प्राधिकरण के अध्यक्ष श्री लखेश्वर बघेल ह नारायणपुर के चेन्दरू मण्डावी के आदमकद प्रतिमा के स्थापना बर 10 लाख रूपिया के स्वीकृति दीन। जिला कार्यालय के सभाकक्ष म आयोजित बैठक म अध्यक्ष श्री बघेल ह हॉलीवुड फिल्म मन म काम करईया चेन्दरू मण्डावी के सम्मान म ये घोषणा करिन।
जानबा हे कि आदिवासी बाहुल्य क्षेत्र नारायणपुर के एक छोटे से गांव गढ़बेंगाल म ’’चेन्दरू मण्डावी’’ के जनम होए रहिस। चेन्दरू ल अपन पिता अऊ दादा ले उपहार स्वरूप शेर के लइका मिले रहिस। चेन्दरू अऊ शेर (टेम्बू) बहुत अच्छा संगवारी हो गे रहिन। उंखर दोस्ती के दास्तान विश्व प्रसिद्ध हो गे। ’’द टाईगर ब्वॉय’’ के नाम ले न केवल चेन्दरू विश्व विख्यात होइस। भलुक वो ह अपन नाम के संग अबुझमाड़ बस्तर ल घलोक विश्व पटल म प्रसिद्ध देवाईस। वोखर जीवन आधारित फिल्म ’’द जंगल सागा’’ ल आस्कर पुरस्कार घलोक मिलिस। विभूति चेन्दरू के प्रतिमा अऊ जीवन परिचय नारायणपुर जिला के ग्राम गढ़बेंगाल म स्थापित करे बर 10 लाख रूपिया बस्तर क्षेत्र आदिवासी विकास प्राधिकरण के माध्यम ले स्वीकृत करे गए हे।