श्री बघेल दूधाधारी मठ परिसर म आयोजित ‘छेरछेरा जोहार’ कार्यक्रम म होही सामिल
रायपुर, मुख्यमंत्री श्री भूपेश बघेल 10 जनवरी के छेरछेरा पुन्नी के दिन राजधानी रायपुर के दूधाधारी मंदिर मठपारा म आयोजित ‘छेरछेरा जोहार’ कार्यक्रम म सामिल होहीं। दूधाधारी मंदिर म दान, धर्म अऊ फसल उत्सव के रूप म छेरछेरा तिहार के आयोजन बिहनिया 9 बजे ले होही। मुख्यमंत्री श्री बघेल बिहनिया 10.45 बजे दूधाधारी मंदिर पहुंचहीं अऊ उहां पूजा-अर्चना करके राजेश्री महंत रामसुदंर दास ले छेरछेरा दान लेके प्रदेशवासी मन के खुशहाली के कामना करहीं। मुख्यमंत्री कार्यक्रम म उपस्थित कलाकार मन के संग मंदिर के तीर-तखार के घर मन ले दान लेके प्रदेश म सुपोषण अभियान ल बढ़ावा देहीं।
ये मौका म प्रदेश सरकार के मंत्री, सांसद, विधायक, महापौर अउ आन जनप्रतिनिधि उपस्थित रइहीं। छेरछेरा पुन्नी जोहार कार्यक्रम के आयोजन छत्तीसगढ़ के लोक कला, संस्कृति, परम्परा, रीति-रिवाज, खान-पान, बोली-भाषा, वेश-भूषा अऊ तीज-तिहार के संरक्षण, संवर्धन अऊ विकास बर संस्कृति विभाग अऊ जनसम्पर्क विभाग कोति ले संघरा करे जाही।
