कोरबा, छत्तीसगढ़ के कोरबा जिला म मानसून के पहिली बरसात के पानी सहेजे बर शुरू करे गए ’छानी के पानी घर म’ अभियान के पाछू छै दिन म दू हजार 73 भवन-ईकाई मन म रेन वाटर हार्वेस्टिंग सिसटम लगाए के काम पूरा हो गए हे। जिला कलेक्टर श्रीमती किरण कौशल के पहल म शहरी अउ ग्रामीण क्षेत्र मन म पहली पइत एक संग बरसा के पानी ल बेकार बोहाए ले रोकत वापिस जमीन म पहुंचाए बर एक संग सरकारी अऊ निजी भवन-ईकाई मन म रेन वाटर हार्वेस्टिंग सिसटम लगाए के अभियान चलाये जात हे। 20 जून ले शुरू होए ’छानी के पानी घर म‘ अभियान के तहत 30 जून तक एक संग करीबन साढ़े चार हजार ले जादा भवन मन-ईकाइ म रेन वाटर हार्वेस्टिंग प्रणाली स्थापना के काम तेजी ले प्रगति म हे।
कलेक्टर श्रीमती कौशल ह बताइस कि ए अभियान बर जिला के ग्रामीण क्षेत्र मन अउ शहरी क्षेत्र मन म विशेष जन जागरूकता कार्यक्रम घलोक चलाये गए रहिस अऊ मनखे मन ल रेन वाटर हार्वेस्टिंग के जरूरत अउ ओखर तकनीकी पहलु मन के घलोक जानकारी दे गए रहिस। उमन कहिन कि जिला के शहरी क्षेत्र मन म सिरिफ छै दिन म 513 ईकाई मन म अऊ ग्रामीण क्षेत्र मन म एक हजार 560 भवन मन म वाटर हार्वेस्टिंग सिसटम स्थापित कर दे गीस। नगर निगम कोरबा म अब तक 447, नगर पालिका क्षेत्र दीपका म 19, नगर पालिका क्षेत्र कटघोरा म 30, नगर पंचायत क्षेत्र पाली म 11 अऊ नगर पंचायत छुरी म छः इकाई मन म अभियान के तहत काम पूरा हो गए हे। अइसनहे ग्रामीण क्षेत्र म जनपद पंचायत कोरबा म 427, करतला म 201, कटघोरा म 315, पाली म 240 अऊ पोंड़ीउपरोड़ा म 377 भवन मन-इकाई मन म बारिश के पानी बचाय वाटर हार्वेस्टिंग सिसटम के काम पूरा करे जा चुके हे।
कलेक्टर ह कहिन कि कोरबा नगर निगम के सबो आठ जोन मन म शासकीय कार्यालय मन के भवन मन, स्कूल भवन मन, माहाविद्यालय, शासकीय अउर निजी अस्पताल मन, बड़े व्यावसायिक अउ आवासीय भवन मन ल मिलाके कुल आठ सौ भवन मन म रेन वाटर हार्वेस्टिंग सिसटम स्थापित करे जाही। ग्रामीण क्षेत्र मन म हर एक ग्राम पंचायत स्तर म पंचायत भवन, शाला भवन, अस्पताल, बड़े आवासीय भवन मन ल मिलाके 12-12 भवन मन म रेन वाटर हार्वेस्टिंग प्रणाली स्थापित करे के लक्ष्य हे। लक्ष्य अनुसार कोरबा जिला के सबो 390 ग्राम पंचायत मन म अइसनहे कुल 4680 भवन मन म एक संग वाटर हार्वेस्टिंग प्रणाली स्थापित होही। शहरी क्षेत्र मन म हर एक जोन स्तर म 100 भवन मन म ये काम करे जाही।
