छठ पर्व प्रकृति के उपासना के पर्व: श्री भूपेश बघेल

रायपुर, मुख्यमंत्री श्री भूपेश बघेल राजधानी म महादेव घाट म आयोजित छठ पर्व समारोह म सामिल होइन। ये कार्यक्रम के आयोजन महादेव घाट छठ पर्व आयोजन समिति कोति ले करे गीस। ये बेरा म मुख्यमंत्री श्री भूपेश बघेल ह सबो ल छठ पर्व के शुभकामना दीन अऊ कहिन कि ये प्रकृति के उपासना के पर्व हे। ये उगत अउ बूड़त सुरुज ल अर्घ्य देहे के पर्व हे। मुख्यमंत्री श्री बघेल ह आयोजन समिति के आग्रह म कहिन कि समिति कोति ले छठ पूजा बर जमीन आबंटन के मांग करे गए हे, समिति कोति ले ये संबंध म शासन ल आवेदन करे म ओ मन ल प्रक्रिया अपनाए के बाद जमीन आबंटित कर देहे जाही। संगेच जमीन आबंटित होए के बाद भवन निर्माण बर घलोक सहायता देहे जाही।
उमन कहिन कि ये पूर्वांचल अउ भोजपुरी समाज के मनखे मन के सबले बड़का पर्व हे। ये पर्व म कोनो भेद-भाव नइ होवय, न कोनो राजा होवय अऊ न कहूं कोनो रंक होवय। सबके प्रति समान भाव रहिथे हे। मुख्यमंत्री ह कहिन कि ये पर्व म कठिन तपस्या के बाद सुरुज के उपासना करे जाथे। सही म सुरुज ऊर्जा के स्रोत होथे। सुरुज के उपासना के बाद हम सबो म ऊर्जा के संचार होथे। ये बेरा म संसदीय सचिव श्री विकास उपाध्याय ह घलोक संबोधन दीन। कार्यक्रम म खाद्य मंत्री श्री अमरजीत भगत, आबकारी मंत्री श्री कवासी लखमा, महापौर श्री एजाज ढेबर, जिला सहकारी बैंक अध्यक्ष श्री पंकज शर्मा संग आन गणमान्य नागरिक उपस्थित रहिन।