देस के पहिली एआई डाटा सेंटर पार्क के देहे जात हे जानकारी
नवा रायपुर म देस के पहिली एआई डाटा सेंटर पार्क ले डिजिटल नवाचार अउ जादा तकनीकी निवेश ला मिलही नवा गति – मुख्यमंत्री श्री साय
रायपुर, भारत मंडपम, नई दिल्ली म आयोजित एआई इम्पैक्ट समिट म छत्तीसगढ़ कोति ले लगाय गे स्टॉल ह देस-बिदेस ले आय निवेशक मन, तकनीक के जानकार मन अउ उद्योग जगत के लोगन मन बर आकर्षण के केंद्र बने हावे।
“छत्तीसगढ़ ड्रिवन बाय इंटेलिजेंस” (Chhattisgarh Driven by Intelligence) थीम ऊपर आधारित ए स्टॉल म राज्य के बढ़त एआई (AI) ताकत, आधुनिक डिजिटल ढांचा अउ निवेश के संभावना मन ला बड़ सुघ्घर ढंग ले देखाय जात हे। स्टॉल म डिजिटल प्रस्तुति अउ जानकारी पैनल के माध्यम ले छत्तीसगढ़ ला एक उभरत टेक्नोलॉजी हब के रूप म पेस करत हे, जेखर ले निवेशक मन म गजब के उत्साह देखे बर मिलत हे।
स्टॉल म खास करके नवा रायपुर म बनत देस के पहिली एआई डाटा सेंटर पार्क के जानकारी प्रमुखता ले देहे जात हे। ए बड़े योजना म लगभग 1,000 करोड़ रुपिया के निवेश के प्रस्ताव हे अउ एमा एक लाख तक ग्राफिक्स प्रोसेसिंग यूनिट (GPU) लगाय के क्षमता तइयार करे जाही। ए योजना ह देस म एआई आधारित सेवा मन अउ डिजिटल नवाचार ला नवा गति देत छत्तीसगढ़ ला भविस्स के अर्थव्यवस्था के एक बड़े केंद्र के रूप म स्थापित करही।
मुख्यमंत्री श्री विष्णु देव साय ह ए मउका म कहिन के एआई इम्पैक्ट समिट म छत्तीसगढ़ के स्टॉल के चर्चा होना प्रदेश बर गरब के बात आय। उमन कहिन के नवा रायपुर म देस के पहिली एआई डाटा सेंटर पार्क के माध्यम ले राज्य ला डिजिटल नवाचार अउ तकनीकी निवेश के अगुआ बनाय बर तेजी ले काम करत हे।
मुख्यमंत्री ह कहिन के ए पहल ह प्रदेश के युवा मन के सपना ला नवा उड़ान देहि अउ छत्तीसगढ़ के उज्जल भविस्स के मजबूत नींव रखही। उमन भरोसा जताइन के छत्तीसगढ़ ह नवा भारत के डिजिटल क्रांति म अगुआ राज्य मन म गिने जाही।
स्टॉल म औद्योगिक विकास नीति 2024-30 के तहत एआई, रोबोटिक्स अउ नवा तकनीक बर सरकार कोति ले देहे जात छूट अउ मदद के जानकारी घलो निवेशक मन ला देहे जात हे। कतको देस-बिदेस के कंपनी मन अउ तकनीकी संस्थान मन ह छत्तीसगढ़ म निवेश करे बर अपन रूचि देखाइन अउ राज्य सरकार के ए दूरगामी पहल के तारीफ करिन।