मुख्यमंत्री श्री बघेल करा छत्तीसगढ़ सर्व विभागीय संविदा कर्मचारी संघ के प्रतिनिधिमंडल ह करिस मुलाकात

संविदा कर्मचारी मन ह अनिश्चितकालीन हड़ताल ल लिस वापिस
संविदा कर्मचारी के वेतन में 27 प्रतिशत वृद्धि करे ब मुख्यमंत्री ले जताइस आभार
मुख्यमंत्री श्री भूपेश बघेल करा काल संझा उकर निवास कार्यालय मे छत्तीसगढ़ सर्व विभागीय संविदा कर्मचारी महासंघ के प्रतिनिधिमंडल ह सौजन्य मुलाकात करिस। मुख्यमंत्री ल प्रतिनिधिमंडल ह संविदा कर्मचारी मन के वेतन में 27 प्रतिशत वृद्धि करे ब आभार जताइस अउ 3 जुलाई ले जारी अनिश्चितकालीन हड़ताल ल वापिस लिए जाए के सूचना दिस।
मुख्यमंत्री ल प्रतिनिधिमण्डल ह बताइस कि पहिली बार संविदा कर्मचारी मन के वेतन में 27 प्रतिशत वृद्धि करे गइस हे। ए फैसला के लाभ छत्तीसगढ़ के समस्त विभाग अउ योजना में कार्यरत संविदा कर्मचारी मन ल मिलही। मुख्यमंत्री श्री भूपेश बघेल ह कहिस कि छत्तीसगढ़ सरकार ह सरलग कर्मचारी मन के हित म अनेक फैसला लेवत हे। जिहां एक कती केंद्र के समान डीए अउ गृहभाड़ा सहित कई ठ घोषणा कर्मचारी मन के हित म करे गईस, उहें अनुपूरक बजट में सबसे जादा 27 प्रतिशत वेतन वृद्धि के निर्णय संविदा कर्मचारी मन ब लिए गय हे। मुख्यमंत्री ल प्रतिनिधिमंडल ह अपन अउ आने मांग के विषय म ज्ञापन सौंपिस हे।
मुख्यमंत्री श्री बघेल ह संविदाकर्मि मन ल उकर ज्ञापन म हरसंभव कार्यवाही करे जाए ब आश्वस्त करिस। ए अवसर म छत्तीसगढ़ सर्व विभागीय संविदा कर्मचारी संघ से प्रदेश अध्यक्ष श्री कौशलेश तिवारी सहित सर्वश्री हेमंत सिन्हा, अशोक कुर्रे, संजय सोनी, विजय यादव, श्रीकांत लास्कर, सुदर्शन मंडल, ताकेश्वर साहू, टीकमचंद कौशिक, गोपालगिरी गोस्वामी, सूरज सिंह ठाकुर, टेकलाल पाटले, परमेश्वर कौशिक, संजय तिवारी, अशोक सिन्हा सहित अनेक सदस्यगण उपस्थित रहिस।