सांसद श्री राहुल गांधी ह छत्तीसगढ़ अमर जवान ज्योति के भूमिपूजन अउ शिलान्यास करिन

रायपुर, सांसद श्री राहुल गांधी ह छत्तीसगढ़ अमर जवान ज्योति के भूमिपूजन अउ शिलान्यास करिन। छत्तीसगढ़ अमर जवान ज्योति छत्तीसगढ़ सशस्त्र बल के चौथइया बटालियन के माना रायपुर म निर्माण करे जाही। देश म कहू पुलिस, सेना अऊ सशस्त्र बल मन म कर्तव्य रत शहीद होवइया छत्तीसगढ़ के वीर अऊ छत्तीसगढ़ म शहादत देवइया देश भर के रणबांकुरा मन के सम्मान म छत्तीसगढ़ अमर जवान ज्योति जलती रइही।
‘छत्तीसगढ़ अमर जवान ज्योति’ देश के वीर सपूत मन के बलिदान के सुरता ल संजोए, ऊंखर प्रति सम्मान अऊ कृतज्ञता अऊ राष्ट्रप्रेम के भावना ल अभी हाल पीढ़ी के संग अवइया भावी पीढ़ि मन के हिरदे म जगाए रखे के प्रभावी माध्यम बनही। ये गौरवशाली स्मारक के माध्यम ले छत्तीसगढ़ के मनखे अपन वीर सपूत मन के पराक्रम अऊ शौर्य के गौरव ल अनुभूत कर सकहीं।