रायपुर, 20 जून 2020। प्रति मनखे रोजेच 55 लीटर शुद्ध पेयजल के उपलब्धता ठउका करके छत्तीसगढ़ देश के अउव्वल राज्य मन म संघर गए हे। छत्तीसगढ़ सरकार ह गांव मन म पेयजल योजना बर 2 हजार के आबादी के बंधन ल खतम करके कम आबादी वाले गांव मन म घलोक पेयजल योजना के माध्यम ले जलापूर्ति के व्यवस्था करे हे, तेकर से ग्रामीण अंचल के मनखे मन ल सहज पेयजल के उपलब्धता होवत हे। मुख्यमंत्री श्री भूपेश बघेल के नेतृत्व अऊ लोक स्वास्थ्य यांत्रिकी मंत्री गुरू रूद्रकुमार के मार्गदर्शन म शहरी अऊ ग्रामीण क्षेत्र मन म मनखे मन ल स्वच्छ पेयजल उपलब्ध कराना राज्य सरकार के बड़का प्राथमिकता हे। भू-जल स्त्रोत मन के संग वर्षा जल के संचयन अऊ भू-जल संवर्धन के संग सतही जल स्त्रोत मन के उपयोग कर स्वच्छ पेयजल उपलब्ध कराए के नीति म राज्य सरकार काम करत हे।
राज्य सरकार ह बी.पी.एल परिवार ल शुद्ध पेयजल उपलब्ध कराए बर साल 2019 म मिनीमाता अमृत धारा योजना चालू करे रहिस हे। जेखर अंतर्गत बी.पी.एल. परिवार ल मुफ्त नल कनेक्शन देहे के प्रावधान रहिस। छत्तीसगढ़ राज्य के ये महत्वाकांक्षी योजना ले अब तक 40 हजार 831 परिवार ल मुफ्त घरेलू नल कनेक्शन देहे जा चुके हे। छत्तीसगढ़ म करीबन 20 हजार गांव हे। जल आवर्धन योजना अंतर्गत 3 हजार गांव म पाइप लाइन के संग पेयजल उपलब्ध कराए जात हे। एखर संगेच जल जीवन मिशन म साल 2024 तक राज्य के हर गांव म घर-घर नल के संग स्वच्छ पेयजल के आपूर्ति ठउका करे के लक्ष्य हे।
राज्य म पेयजल के आपूर्ति ले संबंधित निर्माण अउ संधारण के काम मन ल सहजता ले समय-सीमा म पूरा कराए बर लोक स्वास्थ्य यांत्रिकी विभाग ह सबले पहिली अपन नवा यूएसओआर रेट लागू कर देहे हे। नवा यूएसओआर रेट लागू हो जाय ले पेयजल संबंधी निर्माण अउ मरम्मत के काम मन ल कराए म आसानी होही। नवा यूएसओआर रेट के सेती अब राज्य शासन के राज्यांश के अकतहा आन वित्तीय भार के बचत होही। एखर से राज्य के सुदूर अंचल संग आन इलाका मन म विभागीय कामकाज ल तेजी ले पूरा कराए म मदद मिलही।
