छत्तीसगढ़ अऊ ओडिसा के गहिर नाता : मुख्यमंत्री श्री भूपेश बघेल

• जय बूढ़ी माँ गांड़ा महासभा सामाजिक भवन बर मिलही जमीन
• मुख्यमंत्री सामिल होइन ‘नुआ खाई जुहार भेंटघाट‘ मिलन समारोह म

रायपुर, मुख्यमंत्री श्री भूपेश बघेल आज स्थानीय शहीद स्मारक भवन म जय बूढ़ी माँ गांड़ा महासभा (Jai Budhi Ma Ganda Mahasabha) कोति ले आयोजित नुआ खाई जुहार भेंटघाट (Nuwa Khai Juhar Bhentghat) मिलन समारोह म सामिल होइन। ये मौका म उमन कहिन कि ओडिसा अऊ छत्तीसगढ़ राज्य के गहिर नाता हे। छत्तीसगढ़ अऊ ओडिसा सामाजिक, धार्मिक, सांस्कृतिक, व्यवसायिक अऊ पारिवारिक रूप ले एक दूसर ले जुड़े हे। सबो छत्तीसगढ़वासी भगवान जगन्नाथ के दर्शन बर ओडिसा जाथें, रथ यात्रा के मौका म छत्तीसगढ़ के शहर मन ले लेके गांव तक रथ यात्रा के आयोजन करे जाथे।

मुख्यमंत्री श्री भूपेश बघेल ह समाज के मांग म सामाजिक भवन बर जमीन आबंटित करे के भरोसा दीन। समाज कोति ले जाति प्रमाण पत्र बनाए के मांग म मुख्यमंत्री श्री बघेल ह कहिन कि प्रदेश म जाति प्रमाण पत्र बनाए के प्रक्रिया के सरलीकरण बर पूर्व मंत्री अऊ विधायक श्री रामपुकार सिंह के अध्यक्षता म पांच सदस्यीय समिति गठित करे गए हे। समिति कोति ले जाति प्रमाण पत्र बनाए के मामला म पड़ोसी राज्य मन कोति ले जारी करे जात जाति प्रमाण पत्र के प्रक्रिया के अध्ययन करे जाही।

उमन समाज के मनखे मन ल समिति के आगू अपन विचार रखे ल कहिन। उमन समाज के मनखे मन ल नुआ खाई म शुभकामना अऊ बधाई दीन। कार्यक्रम ल गृह मंत्री श्री ताम्रध्वज साहू, पूर्व मंत्री अऊ वरिष्ठ विधायक श्री सत्यनारायण शर्मा अऊ श्री बृजमोहन अग्रवाल ह घलोक सम्बोधित करिन। ये बेरा म कृषि मंत्री श्री रविन्द्र चौबे, वन मंत्री श्री मोहम्मद अकबर, विधायक श्री कुलदीप जुनेजा अऊ श्री विकास उपाध्याय, जय बूढ़ी माँ गांड़ा समाज के पदाधिकारी मन, प्रतिनिधि मन संग अड़बड़ झन म समाज के मनखे उपस्थित रहिन।