रायपुर, मुख्यमंत्री श्री विष्णु देव साय ह विधानसभा के शीतकालीन सत्र म ‘छत्तीसगढ़ अंजोर विजन 2047’ ऊपर चर्चा करत कहिन कि ये विजन प्रदेश ल साल 2047 तक विकसित छत्तीसगढ़ बनाय के साफ रोडमैप (नक्शा) हरे। उमन कहिन कि ये दस्तावेज आघू के बछर मन म राज के विकास के दिसा तय करही। उमन ए मौका म सबो सदस्य मन ल विकसित छत्तीसगढ़ बनाय म भागीदारी निभाय के नेवता दीन। उमन ए मौका ल ऐतिहासिक बतावत राज के जुन्ना दिन (अतीत), आज के उपलब्धि अउ भविष्य के रद्दा ऊपर प्रकाश डारिन।
भारत आज दुनिया के चउथा सबले बड़का अर्थव्यवस्था
मुख्यमंत्री ह कहिन कि आज के दिन भारी महत्व रखथे, काबर के 14 दिसंबर 2000 के राजकुमार कॉलेज के जशपुर हॉल म छत्तीसगढ़ विधानसभा के पहिली बइठका होय रिहिस। ये जशपुर हॉल ल स्वर्गीय दिलीप सिंह जूदेव ह अपन सांसद निधि ले बनवाए रिहिन। उमन ए ल सुरता करत प्रदेश के लोकतांत्रिक यात्रा ल नमन करिन। मुख्यमंत्री श्री साय ह विज़न डॉक्यूमेंट बनाय बर वित्त मंत्री श्री ओ.पी. चौधरी ल बधाई देवत कहिन के उंकर मार्गदर्शन म ये दस्तावेज तियार होय हे। उमन प्रधानमंत्री श्री नरेंद्र मोदी के नेतृत्व के जिक्र करत कहिन कि 2014 म पहिली पइत प्रधानमंत्री बने के बाद वो अब तीसरइया पइत देश के नेतृत्व करत हें अउ उंकर कोशिश ले भारत आज दुनिया के चउथा सबले बड़का अर्थव्यवस्था बन गए हे।
विकसित छत्तीसगढ़ के यात्रा बर हमन बनाय हवन कुछ खास चरण
प्रधानमंत्री श्री नरेन्द्र मोदी जी ह 2047 तक विकसित भारत बनाय के जो लक्ष्य रखे हें, ओकरे हिसाब ले हमन घलो विकसित छत्तीसगढ़ बनाय के लक्ष्य तय करे हवन। विकसित छत्तीसगढ़ के यात्रा बर हमन कुछ खास चरण (पड़ाव) बनाय हवन। लक्ष्य ल पूरा करे बर हमन समय सीमा तय करे हवन। जइसे साल 2030 तक हमन नजीक के लक्ष्य हासिल करबो। अइसनहे साल 2035 तक मंझोतिया (मध्यवर्ती) अउ 2047 तक लंबा बेरा (दीर्घकालिक) के लक्ष्य हासिल करबो।
अंजोर विजन म 13 क्षेत्र मन के करे गे हे चिन्हारी
‘छत्तीसगढ़ अंजोर विजन डाक्यूमेंट’ जनभागीदारी के एक बढ़िया उदाहरण आय। एला बनाय बर हमन किसान, युवा, महिला, उद्यमी, व्यापारी समेत समाज के हर वर्ग ले सुझाव मांगे रहेन। मोला खुद उंकर मन ले सीधा गोठ-बात करे के मउका मिलिस। ए अंजोर विजन म हमन शिक्षा, स्वास्थ्य, खेती-किसानी, अधोसंरचना जइसन 13 क्षेत्र मन ल चिन्हांकित करके एकर विकास बर 10 मिशन बनाय के फैसला ले हवन। हमन ग्रामीण विकास के संगे-संग शहरी प्लानिंग के बढ़िया मॉडल खड़ा करत हवन। नवा रइपुर भविष्य म सबले तेजी ले बढ़त शहर आय। ये शहर मेडिकल, पढ़ाई-लिखाई (एजुकेशन), कपड़ा (टेक्सटाइल), आईटी अउ एआई के ग्लोबल हब बनत जात हे।
गरीब, किसान अउ वंचित वर्ग के सबो प्रकार ले विकास बर कतको योजना
मुख्यमंत्री ह कहिन कि प्रदेश म बीते बछर मन म गरीब, किसान अउ वंचित वर्ग बर कतको योजना चलाय गिस अउ राज्य के चौमुखी विकास बर सरलग काम करे गिस। उमन बताइन के सरकार के पहिली कैबिनेट बइठका म ही प्रधानमंत्री आवास योजना के तहत 18 लाख आवास ल मंजूरी दे गिस। महिला सशक्तिकरण बर ‘महतारी वंदन योजना’ ऐतिहासिक पहल बनिस। लगभग 70 लाख महतारी-बहिनी मन ल हर महिना 1000 रूपिया के सहायता दे जावत हे। डीबीटी के माध्यम ले अब तक 22 क़िस्त म 14 हजार 306 करोड़ रूपिया ले ज्यादा के राशि जारी करे जा चुके हे। तेंदूपत्ता मजूरी 4000 ले बढ़ाके 5500 रूपिया करे गे हे, जेकर लाभ 13 लाख परिवार ल मिलत हे। चरणपादुका योजना फेर शुरू करे गे हे अउ 73 लाख गरीब परिवार ल फोकट (मुफ्त) म राशन देहे जावत हे।
इको-टूरिज्म, बस्तर पंडुम अउ बस्तर ओलंपिक ले बनिस बस्तर के पहिचान
बस्तर म बस्तर ओलंपिक अउ बस्तर पांडुम जइसन कार्यक्रम के माध्यम ले हमन बस्तर के आम जनता तक पहुंचत हवन। ए साल बस्तर पांडुम म 3 गुना ज्यादा लोगन के भाग लेहे के अनुमान हे, जेन हमर सरकार के सफलता ल देखाथे। आवव ये ऐतिहासिक दिन म हमन सबो संकल्प लेवन के प्रदेश के विकसित छत्तीसगढ़ के सपना ल पूरा करन। इको-टूरिज्म, बस्तर पंडुम अउ बस्तर ओलंपिक जइसे आयोजन बस्तर के नवा पहिचान बनावत हे।
8 लाख करोड़ रूपिया के निवेश प्रस्ताव मिलिस
श्री साय ह कहिन के व्यापार अउ उद्योग बर नवा औद्योगिक नीति लागू करे गे हे। अब तक 8 लाख करोड़ रूपिया के निवेश प्रस्ताव मिले हे। लॉजिस्टिक पार्क, एयर कार्गो सुविधा अउ औद्योगिक पार्क लगाय गे हे। स्थानीय रोजगार ल बढ़ावा देहे जावत हे। हमर सरकार ह 2 साल म 10 हजार ले ज्यादा बेटी-बेटा मन ल सरकारी नौकरी देहे हे। ऊर्जा क्षेत्र म साढ़े तीन लाख करोड़ के निवेश होय हे।
आत्मसमर्पण करइया अउ गिरफ्तार माओवादी मन के पुनर्वास
प्रधानमंत्री श्री नरेन्द्र मोदी जी के दूरदृष्टि अउ केन्द्रीय गृहमंत्री श्री अमित शाह जी के संकल्प अउ हमर बहादुर जवान मन के साहस ले माओवाद अब अपन आखिरी सांस (अंतिम पड़ाव) म हे। हमन मार्च 2026 तक माओवाद ल खतम करे के दिशा म लउहे आगू बढ़त हवन। सरेंडर करइया अउ गिरफ्तार नक्सली मन के पुनर्वास करे जावत हे। सुरक्षा के संग-संग विकास के जरिए बस्तर ल मुख्यधारा ले जोड़े जावत हे। उमन कहिन कि ‘नियद नेल्ला नार’ योजना के तहत दूर-दराज के गांव मन म राशन, आधार, आयुष्मान कार्ड, आवास, बिजली अउ सड़क जइसे बुनियादी सुविधा पहुंचाय गे हे। बस्तर म स्कूल फेर शुरू होय हे।
छत्तीसगढ़ खनिज अउ वन संपदा ले भरे-पूरे राज्य
मुख्यमंत्री ह बताइन कि पाछू दू साल म 10 हजार ले ज्यादा बेटी-बेटा मन ल सरकारी नौकरी देहे गे हे। उमन कहिन के छत्तीसगढ़ खनिज अउ वन संपदा ले भरे-पूरे (समृद्ध) राज्य आय। मुख्यमंत्री ह सदन अउ प्रदेशवासी मन ले आव्हान करिन के सबो झन मिलके विकसित छत्तीसगढ़ के सपना ल सच करे के संकल्प लेवव किरिया खावव।
पीएम सूर्य घर मुफ्त बिजली योजना म डबल सब्सिडी
मुख्यमंत्री श्री साय ह कहिन कि हमन सौर ऊर्जा ल बढ़ावा दे बर ‘पीएम सूर्य घर मुफ्त बिजली योजना’ के तहत घर म सोलर रूफटॉप लगाय बर केंद्र अउ राज्य के डबल सब्सिडी देवत हवन। ऊर्जा क्षेत्र म साढ़े तीन लाख करोड़ रूपिया के निवेश होय हे। सौर ऊर्जा के एक किलोवॉट क्षमता के प्लांट बर केन्द्र सरकार कोति ले 30 हजार रूपिया अउ राज्य सरकार कोति ले 15 हजार रूपिया, कुल मिलाके 45 हजार रूपिया के सब्सिडी देहे जावत हे।
वित्त मंत्री श्री ओ.पी. चौधरी कोति ले प्रस्तुत विज़न 2047 के चर्चा म भाग लेवइया मन म उप मुख्यमंत्री श्री अरूण साव, श्री विजय शर्मा, मंत्री श्री रामविचार नेताम, विधायक सर्वश्री अजय चन्द्राकर, धरमलाल कौशिक, राजेश मूणत, धरमजीत सिंह, सुनील सोनी, श्रीमती भावना बोहरा, सुश्री लता उसेंडी, अनुज शर्मा, सुशांत शुक्ला अउ किरण देव सामिल रहिन।