- विधानसभा अध्यक्ष श्री चरणदास महंत, मुख्यमंत्री श्री भूपेश बघेल, मंत्रीगण अऊ विधायकगण होइन सामिल
रायपुर, छत्तीसगढ़ विधानसभा के सेंट्रल हाल म महान विभूति महात्मा गांधी, सरदार वल्लभभाई पटेल, श्रीमती इंदिरा गांधी अऊ श्री राजीव गांधी के तैलचित्र के समारोहपूर्वक अनावरण करे गीस। प्रदेश म नवा सरकार के गठन अऊ विधानसभा के कार्यवाही के एक साल पूरा होए म आयोजित कार्यक्रम म विधानसभा अध्यक्ष श्री चरणदास महंत, मुख्यमंत्री श्री भूपेश बघेल, नेता प्रतिपक्ष श्री धरमलाल कौशिक, मंत्रीगण अऊ विधायकगण सामिल होइन।
सेंट्रल हॉल म आयोजित कार्यक्रम म विधानसभा अध्यक्ष डॉ. चरणदास महंत ह कहिन कि देश के महान विभूति मन के फोटू इहां लगे ले हमला इंकर काम अऊ सिद्धांत मन ले सतत् प्रेरणा मिलही। संगेच विधानसभा के गौरवशाली परम्परा अऊ समृद्ध होही। ये हॉल के उपयोग लोकसभा के सेंट्रल हाल के समान विधायकगण, पूर्व विधायक अऊ वरिष्ठ मीडिया कर्मी बर अउ विविध आयोजन बर करे जाही। मुख्यमंत्री श्री भूपेश बघेल ह सरकार के कार्यकाल म विधानसभा के कार्यवाही ल एक साल पूरा होए म सबो विधायक मन ल बधाई अऊ शुभकामना दीन। उमन कहिन कि सेंट्रल हॉल ल जीवंत करे बर जऊन सुझाव अऊ सहमति बनही सरकार ओला पूरा करही।
ये मौके म विधानसभा के नेता प्रतिपक्ष श्री धरमलाल कौशिक ह विधानसभा अध्यक्ष के रूप म डॉ. महंत के एक साल के कार्यकाल के बधाई देवत ऊंखर व्यक्तित्व अऊ ऊंखर राजनीतिक काम मन के सराहना करिन। पूर्व मंत्री अऊ विधायक श्री अजय चंद्राकर ह तैलचित्र के अनावरण बर बधाई देवत सेंट्रल हाल ल जीवंत रखे अऊ रियायती दर म जलपान अऊ भोजन के व्यवस्था करे के सुझाव दीन।
