ऑफ सीजन म घलोक छत्तीसगढ़ी बुनकर मन ल मिलीस अपन उत्पाद मनके प्रदर्शन बर बनेच अवसर
रायपुर, नई दिल्ली के छत्तीसगढ़ भवन म लगे छत्तीसगढ़ के प्रसिद्ध बुनकर मन कोति ले निर्मित हैंडलूम अऊ हस्तकला प्रदर्शनी दिल्ली अऊ ओखर आसपास के हैंडलूम कला पारखी मन के आकर्षण के केन्द्र बन गए हे। छत्तीसगढ़ भवन, 7 सरदार पटेल मार्ग म लगे ये प्रदर्शनी म छत्तीसगढ़ के रायगढ़, चांपा अऊ बिलासपुर जिला के बुनकर मन के प्रसिद्ध अऊ विशिष्ट उत्पाद मन ल विक्रय बर प्रदर्शित करे गए हे।
आम तौर मं ये प्रकार के प्रदर्शनी अऊ सेल तिहार के समय लगथे, फेर छत्तीसगढ़ सरकार ह पहल करके ऑफ सीजन म घलोक बुनकर मन ल अपन उत्पाद मन ल विक्रय करे बर एक अवसर प्रदान करे हे। बुनकर मन ह एखर बर राज्य सरकार के आभार व्यक्त करे हें।
एक जुलाई ले चालू होए ये प्रदर्शनी 10 दिन तक चलही। प्रदर्शनी म छत्तीसगढ़ी साड़ी, ड्रेस मटेरियल्स, दुपट्टा, जैकेट, शर्ट, कुरता आदि स्टाल म विक्रय बर उपलब्ध हे। प्रदर्शनी म टेंपल डिजाईन के टसर सिल्क, लिनेन, बाफटा काटन, सिल्क, दुपियोन सिल्क, लिनेन सिल्क, अऊ आन कई प्रकार के उत्पाद घलोक उपलब्घ हे। दिल्ली के गर्मी म बाफटा काटन अऊ लिनेन पहिने बर आदर्श उत्पाद हे। जांजगीर चांपा के बुनकर श्री यशवंत कुमार ह राज्य सरकार के ये पहल बर उंखर आभार व्यक्त करे हें।
