मुख्यमंत्री जी ह छत्तीसगढ़ म प्रधानमंत्री श्री नरेंद्र मोदी के गारंटी म करे गए पहल के जानकारी दीन
रायपुर, 23 दिसंबर 2023। छत्तीसगढ़ के मुख्यमंत्री श्री विष्णुदेव साय ह आज नई दिल्ली म प्रधानमंत्री श्री नरेंद्र मोदी ले मुलाकात करिन। ये बेरा म उमन प्रधानमंत्री जी ले छत्तीसगढ़ के विकास अउ जनहित ले जुड़े मुद्दा मन उपर चर्चा करिन। मुख्यमंत्री श्री विष्णुदेव साय ह प्रधानमंत्री श्री नरेंद्र मोदी ल ‘मोदी के गारंटी’ म छत्तीसगढ़ सरकार कोति ले लेहे गे जल्दी निर्णय अउ पहल के जानकारी दीन। श्री साय ह बताइस कि प्रधानमंत्री जी के घोषणा के मुताबिक सरकार गठन होतेच पहिली कैबिनेट बैठक म 18 लाख ले जादा परिवार के प्रधानमंत्री आवास स्वीकृत करे गीस। उहें, राज्य के किसान मन ले करे गे वादा के मुताबिक छत्तीसगढ़ सरकार ह 1 नवंबर 2023 ले ही 21 क्विंटल प्रति एकड़ धान 3100 रूपिया के दर ले खरीदे के निर्णय लेहे हे। मुख्यमंत्री ह बताइस कि सुशासन दिवस म 13 लाख ले जादा किसान मन ल दू साल के बकाया धान के बोनस राशि 3716 करोड़ 38 लाख रूपिया के भुगतान घलोक करे जाही। मुख्यमंत्री ह बताइस कि अनुपूरक बजट म महतारी वंदन योजना, जल जीवन मिशन, कृषक जीवन ज्योति योजना, सामाजिक सुरक्षा पेंशन आदि योजना मन बर घलोक राशि के प्रावधान करे गए हे। मुलाकात के समय मुख्यमंत्री श्री साय ह केंद्र सरकार कोति ले छत्तीसगढ़ ल 2485.79 करोड़ के राशि जारी करे अउ सेंट्रल पूल म 15 लाख मेट्रिक टन उसना चावल लेहे के अनुमति देहे म प्रधानमंत्री श्री नरेंद्र मोदी के आभार जताइन। उमन कहिन केंद्र सरकार ले मिले ये राशि ले समाज कल्याण के योजना मन अऊ अधोसंरचना विकास के योजना मन के वित्तीय पोषण म मजबूती मिलही। ये बेरा म ऊंखर संग उपमुख्यमंत्री श्री अरुण साव व श्री विजय शर्मा घलोक उपस्थित रहिन।
