बने उपज के कामना बर खेत मन के पूजा-अर्चना करके छिचिन बीज
रायपुर, 18 जून 2024/ मुख्यमंत्री श्री विष्णु देव साय छत्तीसगढ़ राज्य के कमान संभाले के संगे संग अपन पारिवारिक जिम्मेदारी मन ल घलोक बखूबी संभालत हें। उमन आज अपन गृह ग्राम बगिया म मानसून के आहट ल देखत अपन पुश्तैनी खेत मन म खेती-किसानी के शुरूआत करिन। उमन खुदे एक किसान के जइसे धान के बोनीे करके परंपरा के निर्वहन करिन।
मुख्यमंत्री ह परंपरा के मुताबिक पांच पइत बीज ल अपन हाथ म लेके खेत मन म छिंचिन, एखर बाद परिवार ह घलोक ऊंखर अनुसरण करिन। खेती-किसानी ल लेके जशपुर, सरगुजा अंचल के किसान मन म अइसन परंपरा हे, जेमां परिवार के मनखे मुखिया के संग धान के बोनी के रस्म निभाथें।
मुख्यमंत्री खेती-किसानी के पारंपरिक परिधान पहिर के खेत म नजर आइन। उमन पागा पहिरिन अऊ पारंपरिक कुरथा पहिरिन एखर बाद टुकनी म धान बीज रख के पूजा करिन। जानबा हे कि फसल के समृद्धि के कामना बर बीज छिड़के के पहिली ये रस्म जशपुर-सरगुजा क्षेत्र म करे जाथे। छत्तीसगढ़ किसान मन के प्रदेश ये प्रदेश के हर किसान खेती किसानी के तैयारी म जुट गए हे।
आप मन जानतेच होहु के मुख्यमंत्री श्री साय ह प्रदेश म बेहतर खरीफ फसल बर बीते दिन म कृषि विभाग के अधिकारी मन के समीक्षा बैठक घलोक बलाए रहिन। मुख्यमंत्री खुदे किसान ये, ते पाय के ओ मन हमेशा खेती-किसानी ले जुड़े रथे, एकरे सेती उमन समय के पहिलिच अधिकारी मन ल खाद बीज के भरपूर व्यवस्था करे के निर्देश देहे हें। उमन अधिकारी मन ल किसान मन के जरूरत के मुताबिक कृषि अदान मन के व्यवस्था करे अऊ टेक्नोलॉजी के जादा परयोग करत उत्पादकता बढ़ाए ऊपर जोर दे रहिन।
