दुर्ग, 26 मार्च 2020। राजस्व मंत्री श्री जयसिंह अग्रवाल ह अपन तीन महिना के वेतन मुख्यमंत्री सहायता कोष म देहे के घोषणा करे हें। अइसनहे नगरीय प्रशासन मंत्री डॉक्टर शिव कुमार डहरिया ह कोरोना वायरस संक्रमण के रोकथाम म सहायता बर अपन एक महीना के वेतन ‘मुख्यमंत्री सहायता कोष’ म जमा करे के ऐलान करे हे। मंत्री गुरु रूद्रकुमार कोरोना वायरस के संक्रमण के रोकथाम बर अपन एक महिना के वेतन ‘मुख्यमंत्री सहायता कोष’ म जमा करहीं। जरूरतमंद मन के सहायता बर मंत्री श्री अमरजीत भगत देहीं एक महीना के वेतन। नगरीय प्रशासन मंत्री डॉक्टर शिव कुमार डहरिया ह कोरोना वायरस संक्रमण के रोकथाम सहायता बर अपन एक महीना के वेतन ‘मुख्यमंत्री सहायता कोष’ म जमा करे के ऐलान करे हें। अइसनहे छत्तीसगढ़ के जम्मो विधायक अपन-अपन तनखा ल मुख्यमंत्री सहायता कोष म जमा करवाए के घोषणा करे हें।
एकर संगेच भारतीय वन सेवा के अधिकारी मुख्यमंत्री सहायता कोष म जमा करहीं एक महिना के वेतन जउन करीबन 75 लाख रूपिया होही। छत्तीसगढ़ टीचर्स एसोसिएशन तको अपन एक दिन के वेतन देहीं, वन विभाग के अधिकारी-कर्मचारी तको देहीं एक-दो दिन के वेतन। छत्तीसगढ़ के सबो शासकीय अधिकारी-कर्मचारी अपन एक दिन के वेतन देहीं। छत्तीसगढ़ शासकीय अधिकारी कर्मचारी फेडरेशन ह मुख्यमंत्री ल चिट्ठी लिखके जरूरी कार्यवाही करे अनुरोध करे हे। शालेय शिक्षाकर्मी संघ के शिक्षक मन तको एक दिन के वेतन मुख्यमंत्री सहायता कोष म देहे के घोषणा करे हें।
राजनीति ले जुड़े अउ सरकारी अधिकारी-कर्मचारी के अलावा आम जनता तको कोष म अपन-अपन हैसियत अउ सरधा के मुताबिक पइसा जमा करत हें। ये संकट के घड़ी म सरकार मेर कोरोना वायरस संक्रमण के रोकथाम खातिर अउ ओकर से जुड़े उदीम खातिर अड़बड़ अकन काम हे। कोष म जमा कराए गए पाई-पाई ये बेरा म जनता खातिर बहुत उपयोगी होही।
