घर बइठे दरज कराईस सिकायत, एक घंटा म मिलीस राहत
रायपुर, मुख्यमंत्री श्री विष्णु देव साय के उदीम ले चलत सीएम हेल्पलाइन 1076 ह आम मनखे मन के संसो अउ तकलीफ मन के तुरंते अउ असरदार निराकरन करे के एक बड़का माध्यम बनत हे। ये हेल्पलाइन ह सरकार अउ जनता के बीच गोठ-बात ल अउ मजबूत अउ पारदरसी बनाए के संगे-संग नागरिक मन के सिकायत अउ तकलीफ मन के बखत म अउ सुघर समाधान पक्का करे म बड़का भूमिका निभावत हे।
मुख्यमंत्री श्री साय ह 9 जून के सीएम हेल्पलाइन सुरू करे के बाद एखर बने नतिजा आगू आए ल धरले हे। कोरबा सहर के पंपहाउस इलाका के रहइया श्री रामकुमार साहू ह अपन इलाका म सरलग होवत बिजली वोल्टेज अप-डाउन के तकलीफ ल लेके सीएम हेल्पलाइन 1076 म सिकायत दरज कराईस। ओ बतइस के बिजली के आवइ-जवइ म घेरी-बेरी उतार-चढ़ाव होए ले ओमन ल बड़ तकलीफ के सामना करना परत हे।
श्री साहू ह संझा के लगभग 4 बजे मोबाइल फोन म अपन सिकायत दरज कराईस। सिकायत मिलतेच बिजली बिभाग ह फुर्ती देखावत मामला ऊपर तुरंते कारवाही करिस। बिजली बिभाग के टीम ह 100 के.व्ही.ए. छमता के डिस्ट्रीब्यूशन ट्रांसफार्मर के न्यूट्रल के गबड़-सबड़ ल ठीक करके तकलीफ ल दूर करिस। सिकायत दरज होए के लगभग एक घंटा के भीतर संझा 5 बजके 09 मिनट म बिजली के ब्यवस्था ह सामान्य होगे।
सिकायत दरज करे के एक घंटा के भीतर अपन तकलीफ के तुरंते समाधान ले गदगद श्री रामकुमार साहू ह छत्तीसगढ़ सरकार के ये उदीम ल सहरावत कहिन के सीएम हेल्पलाइन 1076 के माध्यम ले अब आम लोगन मन के अवाज सोझे सरकार तक पहुंचत हे। ओमन बतइन के सिकायत दरज करत बखत ओखर तकलीफ ल गम्भीरता ले सुने गीस अउ विभाग कोती ले लउहे कारवाही करके समाधान ठउका करे गीस।
ओ ह लोगन मन ले कहिस के उहू मन सरकार के ये जनहितैषी ब्यवस्था के जादा ले जादा उपयोग करंय अउ अपन तकलीफ, सिकायत मन ल सीएम हेल्पलाइन 1076 के माध्यम ले दरज करावँय। श्री साहू ह नागरिक मन के सुबिधा बर सुरू करे गए ये उदीम बर मुख्यमंत्री श्री विष्णु देव साय के प्रति आभार ब्यक्त करिन।
