- राज्य सरकार कोति ले सबो जिला शिक्षा अधिकारी मन ल जारी होइस हुकुम
- कुछ निजी स्कूल लॉकडाउन म फीस जमा करे के संदेश पालक मन ल भेजत हें
रायपुर, 09 अप्रैल 2020। मुख्यमंत्री श्री भूपेश बघेल के हुकुम के बाद प्रदेश के सबो निजी स्कूल मन म लॉकडाउन के समय म फीस वसूली उपर रोक लगा देहे गए हे। लोक शिक्षण संचालनालय ह निजी स्कूल मन ले फीस वसूली स्थिगित करे के आदेश जारी कर देहे गए हे।
संचालक लोक शिक्षण ह सबो जिला शिक्षा अधिकारी मन ल हुकुम देहे हे के निजी स्कूल लॉकडाउन के बेरा म स्कूल फीस वसूली ल स्थगित रखयं। ये संबंध म सबो जिला शिक्षा अधिकारी मन ल जारी करे गए निर्देश म कहे गए हे के राज्य शासन ल अइसे सूचना मिलत हे के बहुत अकन निजी शाला मन लॉकडाउन के समय के स्कूल फीस जमा करे के संदेश पालक मन ल लगातर भेजत हे। लॉकडाउन के अवधि म स्कूल फीस भुगतान बर दबाव डालना उचित नइ हे। संचालक ह ये संबंध म सबो जिला शिक्षा अधिकारी मन ल अपन सबो अधीनस्थ कार्यालय अऊ शाला मन ल अवगत कराए अऊ एकर पालन सुनिश्चित कराए के निर्देश देहे हें।