रायपुर, जब बीमारी जिंदगी ऊपर भारी परे लागथे अउ इलाज के खरचा परिवार के बस ले बाहिर हो जाथे, त अक्सर आस टूटे लागथे। अइसने दुख के बेरा म सारंगढ़-बिलाईगढ़ जिला के बेटी कृतिका निषाद ल छत्तीसगढ़ सरकार के मुख्यमंत्री विशेष स्वास्थ्य सहायता योजना ह नवा जीवन दीस।
गंभीर बीमारी ले जूझत कृतिका के इलाज बर फोर्टिस अस्पताल, गुरुग्राम म 16 लाख 50 हजार रूपिया के आर्थिक सहायता मंजूर करे गीस। जिला प्रशासन के फुर्ती अउ स्वास्थ्य विभाग के तुरंत कारवाही ले ये मदद समय म मिलिस, जेखर ले परिवार ल करजा के बोझा ले बचावत बढ़िया इलाज हो सकिस।
राज्य सरकार कोति ले चलाय जात ये योजना के तहत गंभीर अउ दुर्लभ बीमारी मन के इलाज बर 25 लाख रूपिया तक के अधिकतम सहायता देहे जात हे, जेन देश म सबले जादा राशि म शामिल हे। ये योजना ओ परिवार मन बर बड़का सहारा बने हे, जेखर बर महँगा इलाज के सोचना घलो असंभव होथे।
स्वास्थ्य विभाग के मुताबिक ये योजना ले कैंसर, हृदय रोग, लिवर अउ किडनी ट्रांसप्लांट जइसे बड़े अउ जटिल इलाज कराय जा सकत हे।
स्वास्थ्य मंत्री श्री श्याम बिहारी जायसवाल ह कहिन हे के कोनो भी नागरिक सिर्फ पइसा के कमी के सेती इलाज ले वंचित झन रहय। कृतिका के कहानी इही संवेदनशील सोच के जिअत-जागत मिसाल बनके आघु आए हे।
इलाज के लड़ई म कृतिका ल मिलिस सरकार के सहारा मुख्यमंत्री विशेष स्वास्थ्य सहायता योजना ले 16.50 लाख के मदद, बांचिस मासूम के जिंदगी
