लंबा समय ले अधूरा सिंचाई परियोजना मन ल पूरा करे ल लेके मुख्यमंत्री सख्त
मुख्यमंत्री ह जल संसाधन विभाग के कामकाज के उच्च स्तरीय समीक्षा करिन
रायपुर, मुख्यमंत्री श्री विष्णु देव साय ह मंत्रालय महानदी भवन म जल संसाधन विभाग के अधिकारी मन के उच्च स्तरीय समीक्षा बैठक लीन। बैठक म विभागीय काम-काज, चलत परियोजना अउ प्रस्तावित सिंचाई परियोजना मन के प्रगति के विस्तार ले समीक्षा करे गीस।
मुख्यमंत्री श्री साय ह कहिन के प्रदेश सरकार किसान मन के हित म सरलग बड़का निर्णय लेवत हे अउ किसान मन के आय दुगुना करे के लक्ष्य के दिशा म हर संभव उदीम करे जात हे। उमन साफ करिन के ए लक्ष्य के प्राप्ति बर सिंचाई सुविधा मन के विस्तार भारी जरूरी हे। मुख्यमंत्री श्री साय ह निर्देश दीन के लंबा समय ले लंबित परियोजना मन ल अटल सिंचाई योजना म शामिल करे गे हे, एला समय म अउ गुणवत्तापूर्ण ढंग ले पूरा करे जाय। उमन दो टूक कहिन के निर्माण काम मन म कोनो भी प्रकार के लापरवाही बर्दाश्त नइ करे जाय।
मुख्यमंत्री श्री साय ह आघू तीन बछर म पूरा होवइया परियोजना मन के जानकारी लेवत कहिन के विकसित छत्तीसगढ़ के निर्माण म किसान मन के भूमिका सबले महत्वपूर्ण हे। खेती के बढ़त रकबा अउ किसान मन के जरूरत ल ध्यान म रखत सिंचाई परियोजना मन के मजबूत होना अनिवार्य हे। उमन कहिन के सिंचाई सुविधा मन के विस्तार बर बजट के कोनो कमी नइ हे अउ एखर बर अलग ले बजटीय प्रावधान करे गे हे। ए परियोजना मन के पूरा होय ले प्रदेश म सिंचित रकबा बाढ़ही अउ किसान मन के उपज म उल्लेखनीय बढ़ोतरी होही।
मुख्यमंत्री श्री साय ह जशपुर जिला के किसान मन के मध्यप्रदेश अध्ययन भ्रमण के उल्लेख करत कहिन के उहां आधुनिक तकनीक के माध्यम ले सिंचाई ल प्रभावी ढंग ले संचालित होत देखके किसान मन भारी उत्साहित होय हें। उमन निर्देश दीन के जेन राज्य मन म सिंचाई क्षेत्र म बेहतर नवाचार करे जात हे, उहां छत्तीसगढ़ के किसान मन के भी अध्ययन भ्रमण कराए जाय, ताकि ओ मन नवा तकनीक अउ काम-काज के तरीका ले अवगत हो सकंय।
बैठक म अधिकारी मन ह जानकारी दीन के आघू तीन बछर म लगभग 10 हजार करोड़ रूपिया के लागत ले 14 सिंचाई परियोजना मन ल चरणबद्ध रूप ले पूरा करे के योजना हे, जेखर ले लगभग 70 हजार हेक्टेयर अतिरिक्त क्षेत्र म सिंचाई सुविधा उपलब्ध होही। एमा 4,800 करोड़ रूपिया ले जादा के लागत वाला चार प्रमुख परियोजना मन के मार्च अउ मई महीना म भूमिपूजन प्रस्तावित हे। ए परियोजना मन म बस्तर जिला के देउरगांव बैराज सह उद्वहन सिंचाई परियोजना, मटनार बैराज सह उद्वहन सिंचाई परियोजना, रायपुर जिला के आरंग विकासखंड म महानदी ऊपर मोहमेला–सिरपुर बैराज योजना अउ गरियाबंद जिला के सिकासार जलाशय ले कोडार जलाशय लिंक परियोजना शामिल हे।
अइसने अटल सिंचाई योजना के अंतर्गत 115 लंबित परियोजना मन बर 346 करोड़ रूपिया के बजट आबंटित करे गे हे, जेखर माध्यम ले लगभग 11 हजार हेक्टेयर अतिरिक्त सिंचाई क्षमता के विकास करे जाही।
बैठक म अंतर्राज्यीय जल विवाद मन के समाधान ऊपर घलो चर्चा करे गीस। आघू तीन बछर म महानदी जल विवाद, पोलावरम बांध के डुबान क्षेत्र अउ समक्का बैराज ले संबंधित मामला मन के निपटारा बर ठोस प्रयास करे जाय ऊपर सहमति बनिस।
ए मौका म मुख्यमंत्री के प्रमुख सचिव श्री सुबोध कुमार सिंह, मुख्यमंत्री के सचिव श्री मुकेश बंसल, जल संसाधन विभाग के सचिव श्री राजेश सुकुमार टोप्पो सहित विभाग के वरिष्ठ अधिकारी उपस्थित रहिन।