ए बछर के शुरुआत म जहाँ जम्मों मनखे मन सोचे रिहिन कि ए बछर मा हम अपन जिनगी के सबले बढ़िया बछर ला बिताबोन। फेर कोन जनि मनखे मन के को जनम के बदला ला ए प्रकृति हा ओकर से लेवत हे। कोरोना वाइरस नाव के महामारी हा पूरा दुनिया ला तपो डारे हे। ए कठिन बेरा म हमर छत्तीसगढ़िया संगवारी मन कोरोना से लड़े बर देश म मिशाल पेश करत हे।हमर छत्तीसगढ़िया लोगन मन के ए खास जिनिस के आया कि हमन कोनो समस्या ला डरन नही अउ ओकर हमेशा डटकर मुकाबला करथन।
हमर प्रदेश छत्तीसगढ़ खेती किसानी बर जाने जाथे, इहाँ किसान अउ मजदूर वर्ग के प्रधानता हे। अउ ए वर्ग म औसतन साक्षरता एककन कम माने जाथे। अइसन म के कोरन्टीन जैसे नवा नवा शब्द लोगन मन बुझे तो नही फेर, एकर मतलब ला पूरा दुनिया ला जरूर बतावत हे।अनुमान लागत रिहस कि ए महामारी ले बचे सेती, सरकार है जे लोकडॉन लगाए हे, ओला लागू कराए म शासन ला अब्बड़ दिक्कत होही, फेर एमा हमर छत्तीसगढ़िया मनखे मन के सहयोग ला देख के आज छाती फूल जाथे। उम्मीद ले बढ़कर हमर छत्तीसगढ़िया संगवारी मन सरकार के साथ देवत हे।
समस्या अउ समाधान
किसान अउ बनिहार वर्ग– जम्मों किसान मन के अभी रबी फसल के कटाई के बेरा आ गे रिहिस, अब लाकडाउन म घर दुवार ले बाहिर नइ निकलना रिहिस, अइसन म फसल कटाई एक बड़े समस्या रिहिन, एकर बर सरकार ला किसान मन ला फसल कटाई बर अनुमति दे दिस, फेर सामाजिक दूरी के नियम ला घलो लागू करे के अपील करिन। सरकार के यहु आदेश ला हमर किसान भाई मन मानिन अउ अपन फसल कटाई के काज ला खुशी खुशी पूरा करिन। लकडाउन म ओ मनखे मन बर जादा चुनोउती रिहिन जेन है रोज बनी बूती कमा के अपन रोजी रोटी चलात रिहिन अब ओ मन ला घलो सरकार हा फोकट म राशन अउ जनधन खाता म पैसा आये ले अपन गुजारा कर डारत हे।
छत्तीसगढ़ के ग्रामीण परिवेश म कोरोना के असर
आजकल के माहोल ल देखते हुए छत्तीसगढ़ ह अब्बड़ जल्दी अब कोरोना मुक्त होए के लच्छन (चिन्हा) दिखत हे। लेकिन ए अब हमर छत्तीसगढ़ के लोगन के जागरूकता के सेती संभव जान पड़त हे। आज पूरा दुनिया जहां ए महामारी के परकोप ला झेलत हे उहिं लगभग डेढ़ महीना के अगोरा बाद अब छत्तीसगढ़ म सबके जिनगी वापस अपन पटरी म दौड़त दिखाई देवत हे। गाँव मे जम्मों किसान अउ मजदूर भाई मन सब अपन काम म लौट गे हे। किन्तु अभी घलो निश्चिंत होए के बात नई हे, सामाजिक दूरी ला हमला बनाये रखना हे। अत्तेक गंभीर महामारी ला छत्तीसगढ़ के जम्मो मनखे मिल के सहज बना दीन। एखर साथ साथ हमर कोरोना के रक्षक मन ला नई भुला सकन ।हमर डाक्टर, पुलिसकर्मी, स्वास्थ्यकर्मी ये जम्मो मन के मानवजाति ऊपर जेन उपकार हे ओला चुकाना मुश्किल आय। ए बहादुरी अउ समझदारी के ही नतीजा आय के छत्तीसगढ़ जल्द ही कोरोना मुक्त राज्य बने के तीर म खड़े हे।
तेकरे सेती कथे रे भइया-
छत्तीसगढ़िया सबले बढ़िया।
– चंद्रशेखर साहू, गुंडरदेही
