छत्तीसगढ़ के कला आयरलैंड तक पहुंचना गौरव के बात : मुख्यमंत्री विष्णु देव साय
रायपुर, आयरलैंड के राजधानी डबलिन म भारत के सांस्कृतिक विविधता के एक ठन जबरदस्त झलक देखे बर मिलिस, जब स्टेट कल्चरल इवेंट सीरीज़ के तहत भारतीय दूतावास, डबलिन कोति ले छत्तीसगढ़ राज्य उप्पर केंद्रित भव्य सांस्कृतिक कार्यक्रम के सफल आयोजन करे गीस। ए कार्यक्रम म आयरलैंड म रहत भारतीय समुदाय के सदस्य मन घलो उत्साह ले भाग लीन्।
कार्यक्रम के उद्घाटन आयरलैंड म भारत के राजदूत श्री अखिलेश मिश्रा ह करिन। उमन छत्तीसगढ़ के समृद्ध सांस्कृतिक विरासत, जनजातीय परंपरा अउ राज्य के खास पहिचान उप्पर प्रकाश डालत कहिन के अइसन आयोजन भारत के विविधता ल वैश्विक मंच म मजबूती ले रखथे।
आयोजन के दौरान छत्तीसगढ़ उप्पर आधारित एक ठन विस्तार ले प्रस्तुति दे गीस, जेमे राज्य के कला, संस्कृति, परंपरा अउ विकास यात्रा ल प्रभावशाली ढंग ले देखाए गीस। एखर संगेच छत्तीसगढ़ के पारंपरिक हस्तशिल्प (Handicraft) के प्रदर्शनी ह आए पहुना मन ल विशेष रूप ले आकर्षित करिस, जिहां राज्य के कारीगरी के बारीकी अउ सुंदरता के तारीफ होइस।
सांस्कृतिक कार्यक्रम के कड़ी म पारंपरिक पहिरावा म लोक नृत्य अउ सांस्कृतिक प्रस्तुति मन ह समां बांध दीस। कलाकार मन के जीवंत प्रस्तुति ह छत्तीसगढ़ के लोकसंस्कृति के आत्मा ल आयरलैंड के धरती तक पहुंचा दीस अउ दर्शक मन ले भरपूर तारीफ बटोरिस।
कार्यक्रम के समापन छत्तीसगढ़ के पारंपरिक व्यंजन (खान-पान) के संग होइस, जेन ह आए पहुना मन ल राज्य के सुवाद वाला पाक-परंपरा ले परिचित कराइस। कुल मिलाके ए आयोजन छत्तीसगढ़ के कला, संस्कृति अउ पहिचान ल अंतरराष्ट्रीय मंच म स्थापित करे के दिशा म एक ठन उल्लेखनीय पहल साबित होइस।
मुख्यमंत्री श्री विष्णु देव साय ह कहिन के आयरलैंड के राजधानी डबलिन म आयोजित छत्तीसगढ़ केंद्रित सांस्कृतिक कार्यक्रम ह छत्तीसगढ़ के समृद्ध कला, संस्कृति अउ परंपरा मन ल अंतरराष्ट्रीय मंच म नवा पहिचान देहे हे। उमन एला छत्तीसगढ़ बर गौरव के पल बतावत कहिन के प्रदेश के लोकसंस्कृति अब वैश्विक दर्शक मन तक पहुंचत हे।
मुख्यमंत्री श्री साय ह कहिन के स्टेट कल्चरल इवेंट सीरीज़ के अंतर्गत भारतीय दूतावास, डबलिन कोति ले आयोजित ए कार्यक्रम भारत के सांस्कृतिक विविधता अउ “एक भारत, श्रेष्ठ भारत” के भावना ल सशक्त रूप ले प्रस्तुत करथे। उमन ए आयोजन बर भारतीय दूतावास अउ आयरलैंड म रहत भारतीय समुदाय के सराहना करिन।
मुख्यमंत्री श्री साय ह कहिन के छत्तीसगढ़ के जनजातीय कला, हस्तशिल्प अउ लोक परंपरा राज्य के पहिचान के मूल आधार हरे। आयरलैंड म आयोजित ए कार्यक्रम के माध्यम ले छत्तीसगढ़ के हस्तकला, पारंपरिक वेशभूषा अउ सांस्कृतिक प्रस्तुति ल अंतरराष्ट्रीय दर्शक मन सराहिन, ए ह राज्य के कलाकार अउ कारीगर मन बर प्रेरणादायी हे। उमन कहिन के अइसन सांस्कृतिक आयोजन ले पर्यटन, हस्तशिल्प अउ स्थानीय उत्पाद मन ल घलो वैश्विक स्तर म नवा संभावना मिलथे। छत्तीसगढ़ सरकार राज्य के कला-संस्कृति के संरक्षण अउ प्रचार-प्रसार बर सरलग उदीम करत हे।
मुख्यमंत्री श्री विष्णु देव साय ह आस बताइन के अवइया समय म घलो छत्तीसगढ़ के सांस्कृतिक विरासत ल देश-विदेश म अइसने मंच मिलही अउ राज्य के खास पहिचान विश्व पटल म अउ जादा मजबूत होही।
