मुख्यमंत्री श्री भूपेश बघेल ह छत्तीसगढ़ विद्युत नियामक आयोग के नवनियुक्त अध्यक्ष श्री हेमन्त वर्मा ल शपथ देवाईन

रायपुर, 03 जुलाई 2021। मुख्यमंत्री श्री भूपेश बघेल ह आज बिहनिया राजधानी रायपुर स्थित अपन निवास कार्यालय म आयोजित कार्यक्रम म छत्तीसगढ़ विद्युत नियामक आयोग के नवनियुक्त अध्यक्ष श्री हेमन्त वर्मा ल पद अऊ गोपनीयता अऊ संविधान के प्रति निष्ठा के शपथ देवाइस। मुख्यमंत्री ह ओ मन ल शुभकामना दीन। श्री हेमन्त वर्मा छत्तीसगढ़ राज्य विद्युत नियामक आयोग के पांचवा अध्यक्ष बनें हें।
विशेष सचिव ऊर्जा अऊ छत्तीसगढ़ पॉवर कंपनी मन के अध्यक्ष श्री अंकित आनंद, छत्तीसगढ़ स्टेट पॉवर होलिंग कंपनी लिमिटेड के एम.डी.श्रीमती उज्जवला बघेल, छत्तीसगढ़ स्टेट पॉवर डिस्ट्रीब्यूशन कंपनी लिमिटेड के एम.डी.श्री हर्ष गौतम, छत्तीसगढ़ राज्य पावर ट्रांसमिशन कंपनी के एम.डी. श्री एस.डी. तेलंग, छत्तीसगढ़ स्टेट पॉवर जनरेशन कंपनी लिमिटेड के एम.डी. श्री एन.के. बिजौरा, छत्तीसगढ़ विद्युत नियामक आयोग के सदस्य श्री विनोद देशमुख, श्री पी.के. देशमुख, श्री प्रमोद गुप्ता, सचिव श्री एम.एस. रत्नम, डायरेक्टर छत्तीसगढ़ विद्युत नियामक आयोग श्री एस.पी. शुक्ला, नोडल अधिकारी श्री मनोज वर्मा ये बेरा म उपस्थित रहिन।
गौरतलब हे कि मूलतः छत्तीसगढ़ के निवासी श्री वर्मा के सम्पूर्ण शिक्षा भिलाई अऊ रायपुर म होए हे। श्री वर्मा ह एन.आई.टी रायपुर ले 1985 म मैकेनिकल इंजीनियरिंग के डिग्री प्राप्त करे हें अऊ दिल्ली आई.आई.टी. ले एनर्जी स्ट्डीस म स्नातकोत्तर डिग्री अऊ फाइनेंस म एम.बी.ए. करे हें। पाछू 30 बछर ले ओ ह पॉवर सेक्टर म कार्यरत हे। ओ ल शासकीय क्षेत्र के संगें-संग निजी क्षेत्र म घलोक काम करे के व्यापक अनुभव हे। वोखर अवइया पाँच साल के अध्यक्ष के कार्यकाल छत्तीसगढ़ म पॉवर सेक्टर के विकास के दिशा के निर्धारण बर महत्वपूर्ण रइही। छत्तीसगढ़ म कोयला आधारित विद्युत उत्पादन के क्षमता के जादा ले जादा राज्य के हित म उपयोग के संगें-संग आम उपभोक्ता मन ल 24 घण्टा गुणवत्तापूर्ण बिजली किफायती दर म उपलब्‍ध कराए म वोखर अनुभव के लाभ छत्तीसगढ़ ल मिलही। एखर अकतहा राज्य के नवा औद्योगिक नीति के अंतर्गत तेजी ले विकसित होवत उद्योग मन ल राष्ट्रीय स्तर म प्रतिस्पर्धा म बनाये रखे बर उंखर अनुभव राज्य के हित म महत्वपूर्ण होही।