- राज्य के शासकीय अधिकारी-कर्मचारी मन बर जुन्ना पेंशन योजना बहाली बर पुष्प गुच्छ भेंटकरके मुख्यमंत्री के करिन अभिनन्दन
- जुन्ना पेंशन बहाली ले छत्तीसगढ़ के अधिकारी-कर्मचारी मन के भविष्य होइस सुरक्षित
रायपुर, मुख्यमंत्री श्री भूपेश बघेल ले आज ऊंखर विधानसभा परिसर स्थित कार्यालय कक्ष म छत्तीसगढ़ कर्मचारी-अधिकारी फेडरेशन के प्रतिनिधि मंडल ह सौजन्य मुलाकात करिस। उमन राज्य के अधिकारी अऊ कर्मचारी मन बर जुन्ना पेंशन योजना बहाली के फैसला बर मुख्यमंत्री ल स्मृति चिन्ह, शॉल अउ पुष्प गुच्छ भेंटकरके उंखर आभार व्यक्त करिन। मुख्यमंत्री श्री बघेल ह राज्य के साल 2022-23 के बजट म जुन्ना पेंशन योजना लागू करे के घोषणा करे हें।
ये बेरा म छत्तीसगढ़ कर्मचारी-अधिकारी फेडरेशन के प्रांतीय संयोजक श्री कमल वर्मा ह कहिन कि मुख्यमंत्री श्री भूपेश बघेल कोति ले संवेदनशीलता के संग लेहे गए ये ऐतिहासिक निर्णय ले छत्तीसगढ़ के अधिकारी-कर्मचारी मन के भविष्य सुरक्षित होए हे। ये निर्णय ले अधिकारी-कर्मचारी मन म हर्ष हे। श्री कमल वर्मा ह कहिन कि छत्तीसगढ़ कर्मचारी-अधिकारी फेडरेशन कोति ले मुख्यमंत्री जी के वृहद अभिनंदन समारोह नवा रायपुर स्थित इंद्रावती भवन म लउहे आयोजित करे जाही। उमन अभिनंदन समारोह म सामिल होए के आग्रह मुख्यमंत्री ले करिन। मुख्यमंत्री श्री बघेल ह एखर बर सहर्ष सहमति प्रदान करिन। ये बेरा म होली के पहिली लंबित 14 प्रतिशत महंगाई भत्ता देहे बर मांग पत्र घलोक सौंपे गीस।
फेडरेशन के प्रतिनिधिमण्डल म सर्वश्री आर.के. रिछारिया, श्री सतीश मिश्रा, श्री राजेश चटर्जी, लक्ष्मण भारती, बी.पी. शर्मा, विजय झा, संजय सिंह, पंकज पांडे, चंद्रशेखर तिवारी, आर.एन. ध्रुव, डी.एस. भारद्वाज, मूलचंद शर्मा, यशवंत वर्मा, मनीष ठाकुर, सत्येन्द्र देवांगन, राकेश शर्मा, राम सागर कौशले, होरीलाल छेदैया, डी.एस. पाटिल, विजय लहरे, मनीष मिश्रा, अश्वनी वर्मा, नीरज सिंह, देवलाल भारती, अश्वनी चेलक अउर फेडरेशन के आन सदस्यगण उपस्थित रहिन।
