मुख्यमंत्री ले मिलके किसान श्री रामलाल ह शोध आगू बढ़ाए बर मांगिस मदद
रायपुर, 07 मार्च 2020। मुख्यमंत्री श्री भूपेश बघेल ह राष्ट्रीय नवाचार किसान सम्मान ले नवाजे गए श्री रामलाल लहरे ल कृषि के क्षेत्र म योगदान बर बधाई दीन अऊ ऊंखर उज्जवल भविष्य के कामना करिन। श्री रामलाल बलरामपुर जिला के वाड्रफनगर विकासखंड के छोटे से गांव महुली के रहइया यें अऊ बायोटेक्नालॉजी म पोस्ट ग्रेजुएट हें। जानबा हे के श्री रामलाल ल ये सम्मान भारतीय कृषि अनुसंधान संस्थान कोति ले दुर्लभ अउ सबले चुरपुर प्रजाति के ‘जइया‘ मिरचा के संरक्षण अउ संवर्धन बर 3 मार्च के राष्ट्रीय विज्ञान मेला दिल्ली म केन्द्रीय कृषि राज्य मंत्री श्री कैलाश चौधरी कोति ले प्रदान करे गीस।
मुख्यमंत्री श्री बघेल ले मुलाकात करके श्री रामलाल ह अपन शोध के सबंध म बताइस अऊ शोध ल आगू बढ़ाए बर सहायता मागिस। वो ह बताइस के सरगुजा अऊ बलरामपुर के पहाड़ी क्षेत्र मन म मिलइया दुर्लभ जइया मिरचा म 2.0 प्रतिशत कैप्सेसिन यौगिक पाए जाथे, जऊन कोलेस्ट्रॉल ल कम करे म सहायक होथे। एखर सबले बड़ी खासियत ये हे कि एक पइत लगाय के बाद करीब 10 साल तक एखर पौधा म मिरचा के पैदावार होथे अऊ एला विशेष देखभाल के घलोक जरूरत नइ होवय। ये मिरचा के टेस्टिंग कराए बर येला, इंदिरा गांधी कृषि विश्वविद्यालय के वैज्ञानिक डॉ. दीपक शर्मा ह भाभा एटॉमिक रिसर्च सेंटर घलोक भेजे रहिस। बायोटेक्नोलॉजी म गोल्डमेडलिस्ट श्री रामलाल लहरे छत्तीसगढ़ी मिरचा ‘जईया‘ ले मधुमेह के दवाई बनाए के दिशा म विशेष प्रयास करत हे।