अंबिकापुर, धान खरीदी के बेवस्था म संतोष जतावत किसान मनोरमा ह कहिन के अभी के बेवस्था बड़ सुग्घर हे अउ एकर ले किसान मन खुस हें। उमन कहिन के धान के सबले जादा दाम मिले ले किसान मन के आमदनी बाढ़त हे।
धान उपार्जन केन्द्र मन म पारदर्शी अउ किसान हितैषी बेवस्था ले किसान मन ला धान बेंचे म राहत मिलत हे। सुग्घर बेवस्था के सेती धान बेंचे के काम अब सरल, सुगम अउ जल्दी हो गे हे। अंबिकापुर के रहइया श्रीमती मनोरमा पाठक ह धान खरीदी बेवस्था ल सहरावत बताइन के उंकर पांच एकड़ 20 डिसमिल जमीन ग्राम सोहगा म हे।
मनोरमा के बताती ये बछर जादा पानी गिरे के सेती उंकर कुछ फसल खराब हो गे, जेकर सेती उंकर करा लगभग 22 क्विंटल धान ही बेंचे बर उपलब्ध हो सकिस। उमन बताइन के धान उपार्जन केन्द्र के माध्यम ले उमन आसानी ले टोकन कटवाइन, टोकन कटाए के प्रक्रिया पूरा तरह ले सुचारू रिहिस।
धान उपार्जन केन्द्र मन के पारदर्शी बेवस्था ले किसान मन ला राहत
धान बेंचे म कोनो प्रकार के परेशानी नइ होइस। श्रीमती पाठक ह बताइन के करजी धान उपार्जन केन्द्र पहुंचतेच गेट पास के बेवस्था, धान के नमी जाँच अउ तुरंत बारदाना उपलब्ध करा दे गीस, जेकर ले धान बेंचे के काम बड़ आसानी ले हो गीस। समिति के केंद्र म किसान मन के सुविधा बर पिये के पानी अउ छांव म बइठे के बढ़िया बेवस्था करे गे हे। संग म समिति के कर्मचारी मन द्वारा किसान मन ला हर स्तर म सहयोग दे जावत हे।
मनोरमा ह कहिन के मुख्यमंत्री श्री विष्णु देव साय के अगुवइ वाले राज्य सरकार कोति ले धान के सबले जादा कीमत 3100 रूपिया प्रति क्विंटल मिलत हे अउ प्रति एकड़ 21 क्विंटल तक धान के खरीदी करे जावत हे, जेकर ले किसान मन ला बड़का लाभ मिलत हे।
