नैनो खातू मन ऊपर बाढ़िस किसान मन के भरोसा

एमसीबी, जिला के मनेन्द्रगढ़ विकासखंड के गांव लालपुर के किसान श्री प्रयाग सिंह ये खरीफ सीजन म खेती-किसानी के नवा तकनीक मन ल अपनाए कोती कदम बढ़ावत हें। तीर-तखार के किसान मन के सफलता अउ बने उत्पादन ले सीख लेके उमन पहली पइत अपन फसल मन म नैनो यूरिया अउ नैनो डीएपी के उपयोग करे के फैसला करे हें।
प्रयाग सिंह ह बताथे के ओ अपन गांव अउ आस-पास के कइ किसान मन के फसल म नैनो खातू मन के उपयोग के सकारात्मक नतीजा देखे हे। फसल मन के बने बढ़वार, पौधा मन के सुघर विकास अउ बढ़िया उत्पादन ह ओखर मन म ये आधुनिक खातू के प्रति भरोसा जगाय हे। ओखर मानना हे के नैनो यूरिया अउ नैनो डीएपी ह फसल मन ल जरूरी पोषक तत्व बने सहिन देथे, जेखर से उत्पादन बाढ़े के भरपूर संभावना रहिथे।
ओ ह बताइस के नैनो खातू मन के सबले बड़का गुन एखर उपयोग अउ सुबिधा हे। जिहां परम्परागत खातू के गरू बोरा मन ल बोहइ किसान मन बर संसो के काम होथे, उहें नैनो खातू ह छोटे-छोटे बोतल मन म मिले के सेती लाए ले जाय, रखे अउ उपयोग करे म सहज होथे। एखर से बखत, मिहनत अउ गाड़ी-भाड़ा म घलो कमी आथे।
प्रयाग सिंह ल भरोसा हे के नैनो खातू मन के प्रयोग ले ओखर फसल के गुन अउ उत्पादन दुनों म सुधार होही। ओ ह बतइस के छेत्र के सहकारी समिति मन के माघ्‍यम ले किसान मन ल बखत म खातू मन के मिलना ठउका करे जात हे। ओखर मानना हे के वैज्ञानिक खेती अउ आधुनिक कृषि नवाचार मन ल अपनाके किसान मन खेती ल जादा कमाऊ, टिकाऊ अउ सुघर बना सकत हें।