महासमुंद म गुटखा जब्ती, 15.50 लाख के जुर्माना
महासमुंद, आम मनखे मन ला साफ-सुथरा, सुरक्षित अउ पौष्टिक खाद्य समान मिले, एखर बर खाद्य एवं औषधि प्रशासन कोति ले प्रदेश भर म सरलग उदुपहा जांच अउ कानूनी कार्रवाई करे जात हे।
धमतरी जिला म 73 दुकान अउ ठउर मन के जांच
खाद्य एवं औषधि प्रशासन, जिला धमतरी डाहर ले जनवरी 2026 म कुल 73 खाद्य ठउर मन के जांच करे गीस। जांच के बखत 14 ठउर मन ला जरूरी सुधार बर निरदेस दे गीस। ए बीच म 1 खाद्य नमूना लीस अउ 2 मामला एडीएम (ADM) कोर्ट म पेश करे गीस।
ग्राहक मन ले मिले सिकायत ऊपर तुरंते कार्रवाई करत 24 घंटा के भीतर रमन स्वीट्स, बस स्टैंड धमतरी ले ‘ढोकला’ के नमूना लेके जांच बर लैब भेज दे गीस। एखर अलावा, खाना परोसे बर अखबार के कागज के उपयोग ला रोके बर प्रेस विज्ञप्ति जारी करके मनखे मन ला जागरूक करे गीस। सबो व्यापारी मन ला फॉसटैक (FoSTaC) ट्रेनिंग लेके ओकर सर्टिफिकेट दुकान म लगाय के निरदेस दे गे हे।
बलौदाबाजार-भाटापारा म पोहा मिल मन ऊपर कार्रवाई
बलौदाबाजार-भाटापारा जिला म जनवरी 2026 के बखत भाटापारा के मातारानी इंडस्ट्रीज, महासती उद्योग अउ एन.एस. इंडस्ट्रीज के जांच करे गीस। मातारानी इंडस्ट्रीज म पैकेट के लेबल ऊपर कंपनी के जगा दूसर फर्म के नाम अउ पता लिखे पाय गीस, जेखर ऊपर कानून के तहत कार्रवाई हुईस। एन.एस. इंडस्ट्रीज म गलत जानकारी दे के मामला म पोहा अउ नायलॉन पोहा के नमूना लेके नोटिस जारी करे गीस।
महासमुंद म गुटखा जब्ती अउ 15.50 लाख के जुर्माना
महासमुंद जिला म जनवरी के महीना म कुल 13 नमूना संकलित करे गीस। कार्रवाई के बखत 92,352 पाउच प्रतिबंधित गुटखा, 2 किलो बेसन अउ 500 ग्राम बारीक सेव जब्त करे गीस। अधिकारी मन ह ए मामला म 15,50,000 रूपया के जुर्माना लगाइन। संगेच, बिना लाइसेंस के काम करे बर 2 मामला म 20,100 रूपया के जुर्माना अउ 51 ठन अखाद्य रंग ला नष्ट करे गीस।
रायगढ़ म संदिग्ध गाड़ी ले दूध के समान जब्त
रायगढ़ जिला म एक संदिग्ध पिकअप गाड़ी ले सहर अउ गांव म बेचे बर ले जावत लगभग 2 लाख रूपया के दूध ले बने समान जब्त करे गीस। ए नमूना मन ला जांच बर रायपुर के सरकारी लैब भेजे गे हे। रिपोर्ट आय के बाद कानून के मुताबिक आगे के कार्रवाई करे जाही।
खाद्य एवं औषधि प्रशासन ह कहिन के मनखे मन के सेहत ला धियान म रखत सुरक्षित अउ नीक समान बर अइसन जांच अउ कार्रवाई आगू घलो जारी रइही।