रायपुर, छत्तीसगढ़ के वन अउ जलवायु परिवर्तन विभाग ल साल 2025–26 के मुख्यमंत्री उत्कृष्टता पुरस्कार म दू ठन प्रतिष्ठित सम्मान मिले हे। विभाग ल ए सम्मान ओकर दू ठन महत्वपूर्ण अउ नवाचार आधारित पहल FDS 2.0 (ई-कुबेर डिजिटल पेमेंट सिस्टम) अउ वन्यजीव (हाथी) ट्रैकिंग अउ अलर्ट प्रणाली के बढ़िया ढंग ले क्रियान्वयन बर दे गे हे।
FDS 2.0 (eKuber डिजिटल पेमेंट सिस्टम) भुगतान व्यवस्था म पारदर्शिता अउ तेजी
FDS 2.0 एक ठन आधुनिक डिजिटल भुगतान प्रणाली हरे, जेकर माध्यम ले वन विभाग के सबो वित्तीय गतिविधि मन ई-कुबेर प्लेटफ़ॉर्म ले सीधा जुड़े हे। ए व्यवस्था ले भुगतान प्रक्रिया पूरा डिजिटल हो गे हे, पारदर्शिता बाढ़े हे। मनखे ले होवइया गलती (मानवीय त्रुटि) के संभावना कम होय हे अउ काम, योजना अउ कर्मचारी मन के भुगतान म तेजी आय हे। ए नवाचार ले विभाग के प्रशासनिक काम मन म दक्षता बाढ़े हे अउ आम नागरिक मन ले जुड़े भुगतान संबंधी काम घलो सरल अउ समय म होवत हे।
वन्यजीव (हाथी) ट्रैकिंग अउ अलर्ट प्रणाली मानव–हाथी संघर्ष म राहत
वन विभाग कोति ले विकसित ए प्रणाली आधुनिक तकनीक ऊपर आधारित हे, जेकर माध्यम ले हाथी मन के गतिविधि मन के वास्तविक समय म निगरानी करे जाथे। ए पहल के माध्यम ले वन क्षेत्र म रहवइया नागरिक मन ल समय म अलर्ट भेजे जाथे, गांव वाले मन ल संभावित खतरा ले पहिली सूचना मिल जाथे, मानव–हाथी संघर्ष कम होय हे, वन्यजीव संरक्षण अउ ग्रामीण सुरक्षा दूनों ल मजबूत सहारा मिले हे। ए प्रणाली विभाग के वन्यजीव प्रबंधन ल अउ जादा वैज्ञानिक, सुरक्षित अउ जनहितकारी बनाथे।
नेतृत्व अउ टीमवर्क के नतीजा
ए दूनों उपलब्धि के पीछे विभागीय नेतृत्व के महत्तम भूमिका रिहिस। वन मंत्री श्री केदार कश्यप ह ए उपलब्धि बर सबो विभागीय अधिकारी मन ल बधाई देहे हें। जानबा हे के एसीएस श्रीमती ऋचा शर्मा, पीसीसीएफ अउ होएफएफ श्री श्रीनिवास राव, पीसीसीएफ (वाइल्डलाइफ़) श्री अरुण पांडे, अउ अधिकारीगण श्रीमती शालिनी, श्रीमती सतोविषा अउ श्री वरुण के मार्गदर्शन, नवाचार ल प्रोत्साहन अउ काम निपटाये ऊपर विशेष ध्यान प्रशंसनीय रिहिस। विभाग के पूरा टीम ह मिलके ए पहल मन ल सफलता के संग लागू करीन्, जेकर नतीजा ये होइस कि विभाग ल दू ठन महत्वपूर्ण सम्मान प्राप्त होय हे।
सुशासन अउ नवाचार ल नवा दिशा
मुख्यमंत्री उत्कृष्टता पुरस्कार के ए सम्मान बताथे के वन विभाग पारदर्शी शासन, तकनीक-आधारित समाधान, नागरिक–केंद्रित सेवा अउ प्रभावी वन्यजीव प्रबंधन के दिशा म लगातार प्रगति करत हे। ए उपलब्धि विभाग के ओ प्रतिबद्धता ल अउ मजबूत करथे, जेकर माध्यम ले वो राज्य म सुशासन, नवाचार अउ सार्वजनिक हित ल प्राथमिकता देथे।
