राज्य भर म मनाए जाही छत्तीसगढ़ गौरव दिवस

रायपुर, मुख्यमंत्री श्री भूपेश बघेल के अगुवई म छत्तीसगढ़ सरकार के चार साल पूरा होए के उपलक्ष्य म 17 दिसम्बर के गौरव दिवस के रूप म मनाए जाही। ये दिन मुख्यमंत्री जनता के नाम संदेश घलोक देहीं। गौरव दिवस के दिन सबो जिला मन के गौठान, सहकारी सोसायटी परिसर, धान खरीदी केंद्र, तेंदुपत्ता संग्रहण केंद्र, वनोपज प्रबंधन समिति मन के कार्यालय स्थल, हाट-बाजार, नगरीय निकाय के वार्ड मन म कार्यक्रम के आयोजन होही। ए कार्यक्रम मन म मनखे मन ल छत्तीसगढ़ सरकार के पाछू चार बछर म हासिल करे गए उपलब्धि, निर्णय के संगें-संग जनकल्याणकारी योजना अऊ कार्यक्रम मन के जानकारी देहे जाही।
मुख्य सचिव श्री अमिताभ जैन ह आज इहां मंत्रालय महानदी भवन म वीडियो कॉन्फ्रेंसिंग के माध्यम ले सबो संभागायुक्त्त, कलेक्टर, जिला पंचायत के मुख्य कार्यपालन अधिकारी, वनमण्डल अधिकारी मन अऊ सहकारिता विभाग संग ए आयोजन ले जुड़े वरिष्ठ अधिकारी मन के बैठक लीन अऊ ओ मन ल गौरव दिवस के आयोजन के संबंध म जरूरी निर्देश दीन। गौरव दिवस के दिन भिनसरहा 11 बजे ले राज्य के सबो गौठान, तेंदुपत्ता संग्रहण केन्द्र, नगरीय क्षेत्र के हर एक वार्ड अऊ मंझनिया 3 बजे ले प्राथमिक सहकारी सोसायटी परिसर अऊ धान खरीदी केन्द्र मन म कार्यक्रम के आयोजन होही।
बैठक म पीसीसीएफ श्री संजय शुक्ला अऊ आयुक्त जनसम्पर्क श्री दीपांशु काबरा वीडियो कॉन्फ्रेंसिंग के माध्यम ले सामिल होइन। आदिम जाति अऊ सामान्य प्रशासन विभाग के सचिव श्री डी.डी.सिंह, कृषि विभाग के सचिव डॉ. कमलप्रीत सिंह, वन विभाग के सचिव श्री प्रेम कुमार संग आन विभाग मन के अधिकारी ये बैठक म सामिल होइन।