मुख्यमंत्री श्री भूपेश बघेल ह राजधानी रायपुर के होटल म स्वदेश न्यूज़ कोति ले आयोजित ‘हमर स्वदेश, हमर प्रदेश कार्यक्रम म कहिन के प्रदेश म मानसून आ गए हे अऊ रोका छेका के काम चलत हे। बने काम म बाधा आथेच, छत्तीसगढ़ महतारी के सेवा म हमन निकले हन, आज खूबचंद बघेल के जयंती के अवसर म कहत हंव कि हमर सरकार महापुरूष मन के नक्शेकदम म चलत हे। हम स्वास्थ्य, शिक्षा रोजगार के क्षेत्र म सरलग काम करत हे, सस्ता दवइ ले मनखे मन ल राहत देवत हे। बीमारी के कोनो बजट नइ होवय, बीमारी बर घलोक 20 लाख तक के सहायता करईया छत्तीसगढ़ के सरकार देश के पहली सरकार ये।
उमन आगू कहिन के आदिवासी संस्कृति के संरक्षण अऊ संवर्धन करे के काम हमर सरकार करत हे। गौमाता के सिरतोन सेवा करत हे, हरेली ले गौमूत्र घलोक बिसाये के काम हम करबो। माटीपूजन के कार्यक्रम ले हमन ग्लोबल वार्मिंग ल लेके संदेश देहे हन, माटी ले हम जे लेवत हन थोड़ा तो धरती दाई ल लहुटावान घलोक, हमन गोधन न्याय योजना ले इही करत हन।
आजे के दिन इंदिरा गांधी जी ह बैंक मन के राष्ट्रीयकरण करे रहिन। पहिली बैंक कुछ चुनिंदा मनखे मन बर रहिस, राष्ट्रीयकरण ले मनखे मन के बैंक तक पहुंच होइस। अब फेर निजीकरण होवत हे, मनखे मन के समस्या मन बाढ़त हे। दूरस्थ क्षेत्र मन म सरकारी बैंक के सेवा हे, निजीकरण होए के बाद बैंक दूरस्थ मनखे मन के ध्यान काबर राखहिं, एखर से वंचित वर्ग के मनखे, नवोदित व्यापार करईया मन ल परेशानी होही। एकर से अमीर अऊ अमीर होही, गरीब अऊ गरीब होत जाही।
बस्तर म मनखे मन ह बैंक अऊ स्कूल के मांग करिन। मनखे मन के मांग म मै ह स्कूल अऊ बैंक के घोषणा घलोक करे हंव। एखर ले पहिली कभू बस्तर म बैंक के मांग नइ होत रहिस। सरकार के योजना मन ले मनखे मन तीर पइसा आवत हे अऊ एखर सेती ओ मन ल बैंक चाही।
बेरोजगारी शासकीय नौकरी देके या फैक्ट्री खोल के कम नइ करे जा सकय।हमने 1998 के बाद पहली पइत शासकीय शिक्षक मन के भर्ती करेन, बाकी पद म घलोक भर्ती करेन, फेर ये तो सीमित ही हे।
हम उद्योग ल सब्सिडी देवत हन, एखर से मनखे मन ल रोजगार मिलत हे। कृषि ल लेके हमन काम करे हन, नवा योजना शुरू करे हन, 22 लाख किसान मन ह ये साल धान बर पंजीयन कराए हें, खेती के रकबा घलोक बाढ़े हे। कोरोना काल म पूरा देश म सब कुछ बंद रहिस, हमन लघु वनोपज खरीदेन अऊ मनखे मन ल रोजगार मिलीस। हम सबो ल छत्तीसगढ़ महतारी के सेवा करना हे। इहां के मनखे मन के शिक्षा, स्वास्थ्य, रोजगार के ध्यान रखना हे। पुरखा मन के सपना ल साकार करना हे, हम सब ल मिल के ये काम करना हे तभे ये संभव हो सकही।
