कोरबा, 30 दिसंबर 2023। छत्तीसगढ़ सरकार के योजना मन के प्रदेश के किसान मन ल प्रत्यक्ष लाभ मिलत हे। धान के बकाया बोनस राशि मिले के बाद किसान परिवार अड़बड़ खुश हे एखर संगेच ओ मन ल आर्थिक मजबूती घलोक मिले हे। मुख्यमंत्री श्री विष्णु देव साय ह सुशासन दिवस म किसान मन ल धान खरीदी के बकाया बोनस राशि प्रदान करिस, जेखर से प्रदेश के किसान संग ऊंखर परिजन म घलोक खुशी के लहर हे।
सरकार कोति ले बकाया बोनस राशि वितरण के महत्वपूर्ण पहल किसान मन के खेती संबंधी अउ परिवार के घरेलू जरूरत मन ल पूरा करे संग लइका मन के पढ़ाई बर घलोक बहुपयोगी साबित होवत हे। कोरबा विकासखंड के ग्राम बरपाली निवासी किसान श्री जनक राम राठिया ह बोनस राशि मिले म प्रसन्नता व्यक्त करत बताइस कि ओ ल बोनस राशि के रूप म एक लाख 38 हजार 840 रुपए मिले हे।
श्री राठिया के कहना हे कि किसान मन के चिंता करइया छत्तीसगढ़ सरकार के ये सार्थक पहल के संग किसान मन ल बड़का सौगात मिले हे। जेखर से प्रदेश के लाखों किसान परिवार खुसी मनावत हे। वेाकर बताती कि ओ अपन 36 एकड़ के पैतृक जमीन म कड़ा मेहनत अऊ उन्नत तकनीक अपनाके फसल के उत्पादन बढ़ावत हे, जेखर से ओखर परिवार आत्मनिर्भर बनत हे। वो ह आगू कहिस कि ये साल घलोक फसल के पैदावार बने होए हे। करीबन 400 क्विंटल धान के बिकही। जनक राम ह कहिस कि मिले बोनस राशि के उपयोग ओ ह अपन घरेलू जरूरत मन के पूर्ति अउ अपन परिजन के जरूरत ल पूरा करे बर करही। जनक राम राठिया ह सरकार के ये सराहनीय अउ किसान हितैषी निर्णय के प्रति आभार व्यक्त करत केंद्र अउ छत्तीसगढ़ सरकार ल धन्यवाद देहे हे।
