विधानसभा सत्र के बाद छत्तीसगढ़ के सघन दौरा करहीं मुख्यमंत्री श्री बघेल

रायपुर, विधानसभा के बजट सत्र पूरा होए के बाद मुख्यमंत्री श्री भूपेश बघेल छत्तीसगढ़ के कई ठन क्षेत्र मन के सघन दौरा करहीं। ये दौरान ओ मन सबो 90 विधानसभा क्षेत्र मन म रात्रि-विश्राम करहीं अऊ शासन के प्राथमिकता वाले योजना मन के प्रगति के समीक्षा करहीं। ओ मन आम-मनखे, जनप्रतिनिधि, समाज-सेवी, व्यापारी, महिला समूह, कर्मचारी संगठन, श्रमिक संगठन मन ले सीधा बातचीत करके शासन के कामकाज के फीडबैक लेहीं।
छत्तीसगढ़ विधानसभा के बजट सत्र 07 मार्च ले शुरु होय हे जेन 25 मार्च तक चलही। मुख्यमंत्री श्री बघेल के प्रस्तावित दौरा ल लेके व्यापक स्तर म प्रशासनिक तैयारी शुरु हो गे हे। अपन ये दौरा के समय श्री बघेल विशेष रूप ले गौठान मन म चलत गतिविधि मन के अवलोकन करहीं। ओ मन सुराजी गांव योजना के अंतर्गत नरवा-गरवा-घुरवा-बाड़ी कार्यक्रम, गोधन न्याय योजना, राजीव गांधी किसान न्याय योजना, राजीव गांधी ग्रामीण भूमिहीन कृषि मजदूर न्याय योजना, मुख्यमंत्री हाट बाजार योजना, मुख्यमंत्री शहरी स्लम स्वास्थ्य योजना, मुख्यमंत्री सुपोषण अभियान, मिलेट मिशन, श्री धन्वंतरी जैनेरिक मेडिकल स्टोर्स योजना, वन अधिकार कानून, वनोपज संग्रहण अऊ प्रसंस्करण, छत्तीसगढ़ रोजगार मिशन, राजस्व प्रकरण मन के निराकरण, जल-जीवन मिशन आदि योजना, कार्यक्रम अऊ अभियान मन के समीक्षा करहीं। मुख्यमंत्री ये दौरान स्‍वामी आत्मानंद अंगरेजी माध्यम स्कूल, स्‍वामी आत्मानंद हिंदी माध्यम स्कूल मन के घलोक निरीक्षण करहीं अऊ छात्र, शिक्षक अऊ अभिभावक मन ले चर्चा करहीं।