जून महिना म चउथईया चउथईया क़िस्त के रूप म 50 करोड़ 93 लाख 36 हज़ार 9 सौ रूपिया महिला मन के बैंक खाता म ज़ारी करे गए हे
रायपुर, 22 जून 2024। श्रीमती लक्ष्मी छत्तीसगढ़ सरकार के महत्वकांक्षी योजना महतारी वंदन योजना महिला मन बर वरदान साबित होवत हे। योजना के असली उद्देश्य अब कारगर होत दिखत हे। रायपुर के श्रीमती लक्ष्मी फुटान ह सपना संजोए रहिस, जेन ल अपन आर्थिक तंगहाली के सेती पूरा नइ कर पाय रहिस, महतारी वंदन योजना ले वोखर जीवन म बड़का बदलाव आए हे।
श्रीमती लक्ष्मी घरेलू महिला ये। वोखर पति गोपाल फुटान रोजी-मजदूरी करथे। श्रीमती लक्ष्मी के बताती पति के कमाई ले घरेलु खर्च तो चल जात रहिस फेर छोट-मोट जरूरत के चीज मन ल खरीदे म अड़बड़ परेशानी उठाए ल परत रहीस। अब ए योजना ले मिले रकम ले वो मन ल पूरा कर पावत हे अऊ बचत घलोक करत हे।
श्रीमती लक्ष्मी ह कहत हे के सोना-चांदी के जेवर पहिरे के सउंख अड़बड़ दिन के हे, फेर माली हालत वोतका अच्छा नइ रहिस, जेखर से जेवर खरीद नइ पाएंव। अब सपना पूरा करे बर ओ ह हर महीना बैंक अकाउंट म योजना ले मिले रकम ल सकेलत हे। जेखर से ओ ह जेवर बिसा सकय। श्रीमती लक्ष्मी ये घलोक कहत हे कि बहुत खुशी होथे के घर बइठे अतका पइसा मिलत हे। वोखर दू लइका टीकम अऊ धनेंद्र के भविष्य के चिंता घलोक रहिस, हमेशा इही लगय के में घलोक कुछ काम कर लेतेंव, फेर राज्य सरकार के महतारी वंदन योजना ले मिले रकम के बचत करके लइका मन के भविष्य घलोक सुरक्षित करत हंव। संगेच अब घर के छोट-मोट चीज मन ल खरीदे बर पति उपर आश्रित रहे के जरूरत नइ परत हे। अब घरेलु खरच ल खुदे पूरा कर लेथंव। अब पइसा बर दूसर के आगू हाथ फैलाए ल नइ परय।
श्रीमती लक्ष्मी कहत हे कि मुख्यमंत्री श्री विष्णुदेव साय ह महिला मन के हित म एक बड़का फैसला लेहे हे। मोर जइसे लाखों महिला मन ल अपन सपना पूरा करे के अवसर मिलत हे। एखर बर वो ह मुख्यमंत्री श्री विष्णुदेव साय ल धन्यवाद देहे हे। ओ ह ये घलोक बतात हे के अब हमर खान-पान घलोक बेहतर होत जात हे। राशन अऊ घर के आन चीज घलोक खरीदे बर करजा लेहे के जरूरत नइ परत हे। अब सशक्त होए के अवसर मिले हे अऊ बेहतर पोषण ले अब जीवन घलोक बेहतर होही अऊ परिवार घलोक स्वस्थ रहे के संग खुशहाल घलोक रहिही। जीवन म उत्तरोतर विकास ले समृद्धि घलोक आही। जानबा हे कि महतारी वंदन योजना के तहत राज्य म विवाहित महिला मन ल 1,000 रूपिया प्रतिमाह (कुल 12,000 रूपिया सालाना) वित्तीय सहायता देहे जात हे, जेन प्रत्यक्ष लाभ अंतरण (डीबीटी) के माध्यम ले सीधा ऊंखर बैंक खाता म जमा होवत हे।
मुख्यमंत्री श्री विष्णुदेव साय कहत हें के उंखर प्रयास अवइया पांच बछर म राज्य के जीडीपी ल दोगुना करे के होही। इही खातिर राज्य के महिला मन ल आत्मनिर्भर बनाए बर बजट म महतारी वंदन योजना बर 3,000 करोड़ रुपिया के प्रावधान करे गए हे। 10 मार्च के पहिली किश्त महिला मन के बैंक खाता म भेजे ल चालू होइस, महतारी वंदन योजना म रायपुर जिला के कुल 5 लाख 29 हज़ार 75 हितग्राही मन ल महतारी वंदन योजना के लाभ मिलत हे, जून महिना म चउथईया किस्त के रूप म 50 करोड़ 93 लाख 36 हज़ार 9 सौ रूपिया महिला मन के बैंक खाता म ज़ारी करे गए हे।
