छत्तीसगढ़ ह रचिस इतिहास! रायपुर अऊ बलौदाबाजार के सरकारी लैब्स बनिस देश के नंबर–1 अऊ नंबर–2

रायपुर, छत्तीसगढ़ ह स्वास्थ्य सेवा के क्षेत्र म एक ऐतिहासिक उपलब्धि दर्ज करे हे। रायपुर के पंडरी स्थित जिला अस्पताल के इंटिग्रेटेड पब्लिक हेल्थ लैब (IPHL) ल भारत सरकार के नेशनल क्वालिटी एश्योरेंस स्टैंडर्ड (NQAS) के तहत देश के पहली क्वालिटी सर्टिफाइड लैब के दर्जा मिले हे, जबकि बलौदाबाजार जिला अस्पताल के IPHL देश के दूसर प्रमाणित लैब बने हे। ये उपलब्धि राज्य के स्वास्थ्य व्यवस्था म तेजी ले होवत वैज्ञानिक अऊ संरचनात्मक सुधार मन के प्रमाण माने जात हे।
भारत सरकार कोति ले नामित विशेषज्ञ टीम ह सितंबर 2025 म दुनों लैबों के विस्तृत मूल्यांकन करिस। पंडरी IPHL ल 90% अऊ बलौदाबाजार IPHL ल 88% स्कोर मिलीस, जेन राष्ट्रीय गुणवत्ता मानक के उत्कृष्ट श्रेणी म आए हे। मूल्यांकन म मरीज-केंद्रित सेवा, सुरक्षा, स्वच्छता, गुणवत्ता नियंत्रण, समयबद्ध रिपोर्टिंग अऊ तकनीकी दक्षता जइसे मानक मन ल सामिल करे गए रहिस।
IPHL मॉडल के उद्देश्य मरीज मन ल एके जगा म पैथोलॉजी, बायोकैमिस्ट्री अऊ माइक्रोबायोलॉजी के सबो जांच सेवा उपलब्ध कराना हे, जेखर से मनखे मन ल निजी लैब्स उपर निर्भरता कम होवय अऊ रिपोट तेज अउ विश्वसनीय मिलय। पंडरी IPHL रोजेच 3,000 ले जादा टेस्ट अऊ 120 ले जादा प्रकार के जांच करत हे। ये रायपुर जिला के CHC–PHC के सैंपल घलोक जांचथे। बलौदाबाजार IPHL घलोक रोजेच 1,000–1,200 जांच करत हे अऊ ग्रामीण क्षेत्र मन खातिर बड़का राहत बने हे।
जनवरी 2024 ले नवंबर 2025 तक छत्तीसगढ़ के 832 स्वास्थ्य संस्था मनके राष्ट्रीय मानक के आधार म मूल्यांकन होय हे। ये मां दूरस्थ दंतेवाड़ा के चिंतागुफा जइसे इलाका घलोक सामिल हे। ये देश म पहला उदाहरण हे जब कोनो राज्य ह अतीक बड़ पैमाना म लैब चेन के प्रमाणीकरण हासिल करे गए होवय।
पंडरी IPHL मॉडल के राष्ट्रीय स्तर म पहिली घलोक सराहना होए हे, इहां तक के भारत सरकार के IPHL गाइडलाइन के कवर पेज म घलोक एखर फोटू सामिल करे गए हे। 13 ले जादा राज्य मन के टीम इहां अध्ययन दौरा करे हें।
मुख्यमंत्री श्री विष्णु देव साय अऊ स्वास्थ्य मंत्री श्री श्याम बिहारी जायसवाल ह दुनों लैब ल बधाई देवत कहिन के ये उपलब्धि छत्तीसगढ़ ल स्वास्थ्य सेवा गुणवत्ता के राष्ट्रीय अग्रणी राज्य मन म स्थापित करथे। सरकार अब सबो जिला मन म इही उच्‍च गुणवत्ता वाले IPHL मॉडल ल लागू करे जात हे। एखर से ग्रामीण अउ आदिवासी क्षेत्र मन म जांच सेवा अऊ जादा सुलभ, तेज अऊ विश्वसनीय बनही।
ये प्रमाणन सिरिफ उपलब्धि नो हे, बल्कि संकेत हे के छत्तीसगढ़ अब पूरा मजबूती के संग गुणवत्ता-आधारित स्वास्थ्य प्रणाली कोति बढ़ चुके हे।