- अमेजन अऊ फ्लिपकार्ट जइसे ऑनलाईन प्लेटफॉर्म्स म हर्बल ब्रांड के लगातार बाढ़त हे मांग
रायपुर, घरेलू अउ अंतर्राष्ट्रीय बाजार म छत्तीसगढ़ हर्बल ब्रांड के उत्पाद मन के मांग लगातार बाढ़त हे। अमेजन अऊ फ्लिपकार्ट जइसे ऑनलाईन प्लेटफॉर्म्स म हर्बल ब्रांड के लगातार बाढ़त मांगके सेती छत्तीसगढ़ हर्बल्स के उत्पाद विक्रय बर उपलब्ध हे। अब छत्तीसगढ़ के सबो शासकीय विभाग मन ल हर्बल्स ब्रांड के उत्पाद के खरीदी करे म 10 प्रतिशत के छूट मिलही। मुख्यमंत्री श्री भूपेश बघेल के निर्देश म राज्य शासन के सबो विभाग मन, शासकीय उपक्रम अऊ नगर निगम ल ये छूट के लाभ मिलही। ये निर्णय ले राज्य म छत्तीसगढ़ हर्बल के उत्पाद मन के बिक्री म अऊ जादा वृद्धि होही।
राज्य म साल 2019-20 म एक करोड़ 25 लाख रुपिया, साल 2020-21 म 2 करोड़ 15 लाख, अऊ साल 2021-22 के पहिली 9 महीना म 4 करोड़ 34 लाख रुपिया के मूल्य के उत्पाद मन के बिक्री राष्ट्रीय अऊ अंतर्राष्ट्रीय बाजार मन म हो गे हे। साल 2022 म ये आंकड़ा लगातार बाढ़त हे। अमेजन अऊ फ्लिपकार्ट जइसे ऑनलाईन प्लेटफार्म, श्री धन्वंतरी जेनेरिक मेडिकल स्टोर्स, ग्रामीण ई-स्टोर के सीएससी नेटवर्क ह देश के अलग-अलग राज्य मन म ग्रामीण अउ शहरी क्षेत्र मन म छत्तीसगढ़ हर्बल बर बाजार बनाए म मदद करे हे।
छत्तीसगढ़ हर्बल्स के बहुत अकन उत्पाद मन ल पूरा दुनिया म अपन अलग पहिचान मिलत हे, एमां अनाज, स्वदेशी मसाला, कुकीज़, पर्सनल केयर आइटम्स अऊ वनोपज मन म नवोन्मेष के संग राज्य लघु वनोपज सहकारी संघ के माध्यम ले 150 ले घलोक जादा उत्पाद मन के बिक्री होवत हे। जेखर बर प्रदेश के सबो जिला मन म 30 संजीवनी केंद्र के शुरुआत करे गए हे, जिहां हर्बल ब्रांड के उत्पाद मन के बिक्री करे जात हे।
