रायपुर, गणतंत्र दिवस म राजपथ म कई राज्य अउ विभाग कोति ले निकलइया झांकी मन म ये पइत छत्तीसगढ़ के झांकी ह सबके सियानी करही। सनिवार के राष्ट्रीय रंगशाला कैम्प म जनसंपर्क विभाग के आयुक्त श्री तारन प्रकाश सिन्हा ह झांकी निर्माण के जायजा लीन। ये दौरान उमन सांस्कृतिक दल मन ले घलोक मुलाकात करिन अऊ उंखर उत्साह वर्धन करिन छत्तीसगढ़ के दूरिहा आदिवासी अंचल नारायणपुर ले आए आदिवासी कलाकार मन कोति ले रंगारंग सांस्कृतिक कार्यक्रम मन के प्रस्तुति दीए जात हे।
हम आप ल बता देवन के नई दिल्ली के राजपथ म ये पइत छत्तीसगढ़ के झांकी घलोक निकलही, राजपथ म निकलइया कई राज्य मन के झाँकी के क्रम म छत्तीसगढ़ राज्य के झाँकी के क्रम सबले पहिली होही। छत्तीसगढ़ के झाँकी मा प्रदेश के कला अऊ आभूषण के प्रदर्शन करे जाही। झांकी के निर्माण राष्ट्रीय रंगशाला कैम्प नई दिल्ली म करे जात हे, जेखर जांच बर आज छत्तीसगढ़ ले जनसंपर्क विभाग के आयुक्त श्री तारन प्रकाश सिन्हा घलोक पहुँचिन। झांकी के अवलोकन के संगेच उमन छत्तीसगढ़ ले झांकी म सामिल होए पहुँचे सांस्कृतिक दल के कलाकार मन ले मुलाकात करके उंखर उत्साह वर्धन करिन। राजपथ म झांकी के संग छत्तीसगढ़ के नृतक दल ह ककसार नृत्य के प्रदर्शन तको करहीं।
