इन्वेस्टर कनेक्ट म हैदराबाद के निवेसक मनला मुख्यमंत्री साय ह दीन नेवता।
आईटी, टेक्सटाइल, डेटा सेंटर, फार्मा के क्षेत्र म खुलिस 7,800 रोजगार के रस्ता
हैदराबाद, छत्तीसगढ़ ह पूंजी निवेश ला खींचे के दिसा म एक अउ बड़का उपलब्धि पाय हे। हैदराबाद म आयोजित ‘छत्तीसगढ़ इन्वेस्टर कनेक्ट’ कार्यक्रम म कइ क्षेत्र के सात ठन बड़का कंपनी मनहा 9,580 करोड़ रुपिया के निवेस करे के प्रस्ताव देहे हें, जेकर ले 7,800 ले जादा रोजगार के अवसर बने के संभावना हे। ये मौका म मुख्यमंत्री श्री विष्णुदेव साय ह देस के बड़े उद्योगपति अऊ निवेसक मनला छत्तीसगढ़ म पूंजी लगाय बर नेवता देवत कहिन के विकसित भारत के ग्रोथ इंजन के रूप म छत्तीसगढ़ हा तेजी ले आघू आवत हे अऊ राज्य म निवेसक मन बर ‘रेड कारपेट’ बिछे हे।
ये कार्यक्रम म छत्तीसगढ़ के वाणिज्य अऊ उद्योग मंत्री श्री लखन लाल देवांगन संग दक्खिन भारत के कइ बड़े उद्योगपति, निवेसक अऊ ब्यापारी प्रतिनिधि मन उपस्थित रहिन।
कार्यक्रम म मुख्यमंत्री श्री साय ह बताइन के नवा औद्योगिक नीति लागू होय के बाद दिल्ली, मुंबई, बेंगलुरु के संगे-संग जापान अऊ दक्खिन कोरिया म आयोजित इन्वेस्टर कनेक्ट कार्यक्रम मनके माध्यम ले राज्य ला 8 लाख करोड़ रुपिया ले जादा के निवेस प्रताव मिले हे। राज्य सरकार ये प्रताव मनला भुइँया म उतारे बर लउहे काम करत हे।
मुख्यमंत्री श्री साय ह कहिन के छत्तीसगढ़ आज निवेस बर देस के सबले अक्छा राज्य मन म एक बनके आघू आवत हे। राज्य म उद्योग मन बर असान तरीका, सिंगल विंडो ब्यवस्था, सुग्घर आधारभूत सुबिधा अऊ उद्योग के हित म नीति तियार हे। उमन निवेसक मनला छत्तीसगढ़ म उद्योग लगाय बर नेवता दीन।
मुख्यमंत्री ह कहिन के हैदराबाद ह आईटी, फार्मा, बायोटेक्नोलॉजी अऊ एयरोस्पेस जइसे क्षेत्र मन म बड़का सफलता पाय हे। छत्तीसगढ़ घलो ये क्षेत्र मन म तेजी ले आगू बढ़त हे अऊ दूनो राज्य के उद्योगपति अऊ व्यापारी मन मिलके नवा अवसर मनके लाभ उठा सकत हें।
उमन कहिन के मध्य भारत म स्थित छत्तीसगढ़ हा देस के सबले सुग्घर लॉजिस्टिक हब बने के ताकत रखथे। छत्तीसगढ़ हा सात ठन राज्य मनले घिरे हे अऊ 60 करोड़ ले जादा उपभोक्ता मन तक सोझ पहुंच देथे। रेलवे नेटवर्क, भारतमाला परियोजना, एयर कार्गो के सुबिधा अऊ खनिज संपदा के उपलब्धता उद्योग मन बर एला बड़ अनुकूल बनाथे।
मुख्यमंत्री ह कहिन के छत्तीसगढ़ देस म ग्रीन स्टील ला बढ़ावा देवया अगुआ राज्य मन म सामिल हे। बिजली के क्षेत्र म राज्य ला 3.5 लाख करोड़ रुपिया ले जादा के निवेस प्रताव मिले हें, जेकर ले प्रदेस हा देस के एक बड़का पावर हब के रूप म उभरत हे।
कार्यक्रम म मुख्यमंत्री श्री विष्णुदेव साय ह सात ठन प्रमुख कंपनी मनला छत्तीसगढ़ म निवेस बर ‘इन्विटेशन टू इन्वेस्ट’ सौंपिन। एमा डेटा सेंटर, सीमेंट, सेमीकंडक्टर अऊ जीपीयू इंफ्रास्ट्रक्चर, सौर ऊर्जा के समान निर्माण, कपड़ा, फार्मास्यूटिकल अऊ डेयरी प्रसंस्करण क्षेत्र के नामी कंपनी मन सामिल हें।
सबले बड़का निवेस प्रताव हाइपरनेक्स्ट डाटा सेंटर लिमिटेड डहर ले मिलिस, जेमन छत्तीसगढ़ म भारत के पहिली समर्पित डिजास्टर रिकवरी डेटा सेंटर कैंपस बनाय बर ₹4,200 करोड़ के निवेस के प्रताव दीन। ये परियोजना ले राज्य म डिजिटल इंफ्रास्ट्रक्चर ला मजबूती मिलही अऊ छत्तीसगढ़ हा डेटा सेंटर क्षेत्र के एक बड़का केंद्र बन सकही। ये काम ले लगभग 250 रोजगार के अवसर बनही।
फीग्रेड एंड कंपनी प्राइवेट लिमिटेड ह सीमेंट क्षेत्र म 2,912 करोड़ रुपिया निवेस करे के प्रस्ताव देहे हे, जेकर ले लगभग 4,000 मनखे मनला रोजगार मिले के संभावना हे। उहें निवाई लैब्स प्राइवेट लिमिटेड ह ₹1,000 करोड़ के निवेस ले एआई (आर्टिफिशियल इंटेलिजेंस), जीपीयू इंफ्रास्ट्रक्चर, एडवांस कंप्यूटिंग अऊ सेमीकंडक्टर असेंबली ले जुड़े सुबिधा मनला विकास करे के प्रस्ताव दीस। एखर ले राज्य म आधुनीक तकनीकी उद्योग मनला बढ़ावा मिलही अऊ लगभग 200 रोजगार बनही।
सौर ऊर्जा के समान बनाय के क्षेत्र म एसजी मार्ट लिमिटेड ह 700 करोड़ रुपिया निवेस के प्रताव देहे हे, जेकर से लगभग 450 मनखे मनला काम मिल सकत हे। श्री सरवणा मिल्स प्राइवेट लिमिटेड ह ₹528 करोड़ के निवेस ले आधुनीक टेक्सटाइल अऊ कपड़ा निर्माण इकाई लगाय के प्रताव रखे हे। ये परियोजना ले लगभग 2,500 मनखे मनला रोजगार मिले के संभावना हे।
फार्मास्यूटिकल क्षेत्र के काबरा ड्रग्स ह 200 करोड़ रुपिया अऊ डेयरी क्षेत्र के दिनशॉज़ डेयरी फूड्स प्राइवेट लिमिटेड ह 40 करोड़ रुपिया निवेस के प्रस्ताव देहे हे। ये दूनो परियोजना मनले लगभग 250 अऊ 150 रोजगार के अवसर बनही।
हैदराबाद दौरा म मुख्यमंत्री श्री विष्णुदेव साय अऊ राज्य के अधिकारी मनके टोली ह देस के कइ बड़े कंपनी मनके बड़े अधिकारी मनके संग बैठक करिन। एमा पेज इंडस्ट्रीज अऊ डेल्टा इलेक्ट्रॉनिक्स, एक्सिस एनर्जी, सेल्कॉन ग्रुप, मैग्नमविंग्स जइसे प्रमुख कंपनी मन सामिल रहिन। बैठक म छत्तीसगढ़ म निवेस के संभावना, मिलइया औद्योगिक सुबिधा अऊ राज्य सरकार के उद्योग-अनुकूल नीति मन उपर सुग्घर चर्चा होईस।
एखर संगेच स्वामी नारायण गुरुकुल संगठन के प्रतिनिधि मन घलो मुख्यमंत्री ले मिलके रायपुर के टाटीबंध म 650 बिस्तर वाले चैरिटेबल अस्पताल के स्थापना के प्रस्ताव उपर गोठ-बात करिन।
इन्वेस्टर कनेक्ट कार्यक्रम म आईटी, डेटा सेंटर, सेमीकंडक्टर, इलेक्ट्रॉनिक्स, फार्मास्यूटिकल्स, एयरोस्पेस अऊ रक्षा, ग्लोबल कैपेबिलिटी सेंटर (जीसीसी) अऊ आधुनीक विनिर्माण जइसे आघू के दिन के उद्योग मन म निवेस के बेरा मनला प्रमुखता ले देखाय गीस। निवेसक मनहा ये क्षेत्र मन म बिसेस रूचि देखाइन।
ये कार्यक्रम म सीएसआईडीसी के अध्यक्ष श्री राजीव अग्रवाल, मुख्यमंत्री के प्रमुख सचिव श्री सुबोध कुमार सिंह, उद्योग विभाग के सचिव श्री रजत कुमार, मुख्यमंत्री के सचिव श्री राहुल भगत, इन्वेस्टमेंट कमिश्नर सुश्री रितु सैन, सीएसआईडीसी के प्रबंध संचालक श्री विश्वेश कुमार, उद्योग विभाग के संचालक श्री प्रभात मलिक अऊ दूसर अधिकारी मन घलो सामिल रहिन।