छत्तीसगढ़ देश के तीसरइया सबले स्वच्छ राज्य

स्वच्छ सर्वेक्षण म राज्य के संग पांच नगरीय निकाय मन ल घलोक मिलीस पुरस्कार
राष्ट्रपति के हाथ मुख्यमंत्री श्री विष्णु देव साय अऊ उप मुख्यमंत्री श्री अरूण साव ह ग्रहण करिस पुरस्कार

रायपुर, 11 जनवरी 2024। छत्तीसगढ़ देश के तीसरइया सबले स्वच्छ राज्य बन गए हे। केन्द्रीय आवासन अऊ शहरी कार्य मंत्रालय कोति ले आयोजित स्वच्छ सर्वेक्षण-2023 म छत्तीसगढ़ ल महाराष्ट्र अऊ मध्यप्रदेश के बाद देश के तीसर सबले साफ-सुथरा राज्य के दर्जा मिले हे। प्रदेश के ये उपलब्धि बर राष्ट्रपति श्रीमती द्रौपदी मुर्मु ह आज नई दिल्ली के भारत मंडपम कन्वेन्शन सेंटर म आयोजित समारोह म पुरस्कृत करिस। मुख्यमंत्री श्री विष्णु देव साय अऊ उप मुख्यमंत्री व नगरीय प्रशासन अऊ विकास मंत्री श्री अरूण साव ह ये पुरस्कार ग्रहण करिन। केन्द्रीय आवासन अऊ शहरी कार्य मंत्री श्री हरदीप सिंह पुरी, सचिव श्री मनोज जोशी अऊ स्वच्छ भारत मिशन (शहरी) के निदेशक श्रीमती रूपा मिश्रा घलोक समारोह म सामिल होइन। स्वच्छ सर्वेक्षण म उत्कृष्ट प्रदर्शन करइया राज्य के पांच नगरीय निकाय रायपुर, महासमुंद, कुम्हारी, आरंग अऊ पाटन ल घलोक समारोह म पुरस्कृत करे गीस।
मुख्यमंत्री श्री विष्णु देव साय अऊ उप मुख्यमंत्री श्री अरूण साव ह प्रदेश अऊ नगरीय निकाय के ये उपलब्धि म संबंधित निकाय के निर्वाचित जनप्रतिनिधि, अधिकारी, समन्वयक अऊ स्वच्छता दीदि मन ल बधाई अऊ शभकामना देहे हें। उमन कहिन कि इंकर उत्कृष्ट काम मन के कारण आज प्रदेश ल राष्ट्रीय स्तर म गौरवान्वित होए के मौका मिले हे। उमन उम्मीद जताईन कि राज्य के शहर ल साफ-सुथरा अऊ कचरामुक्त रखे बर ये आगू घलोक अपन बेहतरीन काम मन ल जारी रखहीं अऊ आन नगरीय निकाय मन बर प्रेरणास्रोत बनही।