राज्य सरकार जल संरक्षण ला जनआंदोलन बनाए बर संकल्पित – मुख्यमंत्री श्री साय

जल संरक्षण ला दिनचर्या के हिस्सा बनाए, जल संरचना मन के रक्षा अउ जल के प्रति जिम्मेदारी वाले सोच अपनाए के मुख्यमंत्री ह करिन आह्वान
मुख्यमंत्री श्री साय अउ केंद्रीय जल शक्ति मंत्री श्री सी. आर. पाटिल के संघरा अध्यक्षता म “जल संचय-जन भागीदारी 2.0” अभियान के क्रियान्वयन के होईस गहिर समीक्षा
केंद्रीय जल शक्ति मंत्री ह छत्तीसगढ़ म जल संरक्षण के क्षेत्र म होवत काम अउ नवाचार मन के करीन सराहना
31 मई तक 10 लाख जल संरचना मन के लक्ष्य, जल सुरक्षा ला मिलही नवा आधार
डबरी निर्माण ले बाढि़स भू-जल स्तर, किसान मन ला मिलही अकतहा लाभ

रायपुर, मुख्यमंत्री श्री विष्णु देव साय अउ केंद्रीय जल शक्ति मंत्री श्री सी. आर. पाटिल के संघरा अध्यक्षता म आज नवा रायपुर स्थित मुख्यमंत्री निवास कार्यालय म आयोजित बैठक म प्रदेश म “जल संचय-जन भागीदारी 2.0” अभियान के क्रियान्वयन के गहिर समीक्षा करे गीस। केंद्रीय मंत्री श्री पाटिल ह ए बैठक म वर्चुअली सामिल होइन अउ बैठक ला संबोधित करिन। ए बेरा म बिलासपुर, दुर्ग अउ सूरजपुर जिला के कलेक्टर मन ह अपन-अपन जिला म अभियान के अंतर्गत चलत काम अउ गतिविधि मन के पूरा जानकारी दीन।
मुख्यमंत्री श्री साय ह कहिन के जल संकट 21वीं सदी के सिरिफ गंभीर पर्यावरणीय ही न ही, बल्कि आर्थिक, सामाजिक अउ विकासात्मक चुनौती घलो बन चुके हे। उमन कहिन के जल संरक्षण ला स्थायी अउ प्रभावी बनाए बर जनभागीदारी जरूरी हे। उमन देस के यशस्वी प्रधानमंत्री श्री नरेंद्र मोदी के ओ संदेश के जिक्र करीन, जेमा पानी के उपयोग ला परसाद के समान मानत हुए जल के प्रति संवेदनशील अउ जिम्मेदार नजरिया अपनाए बर जोर देहे गे हे। मुख्यमंत्री ह कहिन के प्रधानमंत्री के मार्गदर्शन ले प्रेरित होके राज्य सरकार जल संरक्षण ला जनआंदोलन के रूप दे बर संकल्पित हे।
मुख्यमंत्री श्री साय ह कहिन के अभियान के पहिली चरन म छत्तीसगढ़ ह देसभर म दूसरा स्थान पाइस अउ अलग-अलग जिला मन ला घलो अलग-अलग श्रेणी म इनाम मिलिस। पहिली चरन म सामुदायिक भागीदारी के मॉडल म काम करत बड़का पैमाना म बोरवेल रिचार्ज, रूफटॉप रेनवॉटर हार्वेस्टिंग, रिचार्ज शाफ्ट, सोक पिट अउ ओपनवेल रिचार्ज जइसे संरचना मन के निर्माण करे गीस। श्री साय ह कहिन के प्रदेश म अभी 5 क्रिटिकल अउ 21 सेमी-क्रिटिकल भू-जल ब्लॉक चिन्हित हे। बछर 2024 के तुलना म 2025 म एमां ले 5 ब्लॉक म भू-जल निकासी म कमी अउ भू-जल स्तर म सुधार देखे गे हे, जेकर ले जल संरक्षण के कोसिस के बने परिणाम दिखत हे।
मुख्यमंत्री श्री साय ह कहिन के अभियान के दूसर चरन “जल संचय-जन भागीदारी 2.0” के तहत तकनीक आधारित अउ जादा परिणाम देइया रणनीति अपनाए जात हे। राज्य सरकार ह 31 मई 2026 तक 10 लाख जल संरक्षण संरचना मन के निर्माण के लक्ष्य रखे हे। मुख्यमंत्री ह एला जल सुरक्षा के डहर म प्रदेश के ऐतिहासिक कदम बताइन। उमन कहिन के राज्य के रजत जयंती बछर के मउका म एक बिसेस पहल के तहत 10 एकड़ ले जादा जमीन वाले चार लाख ले जादा किसान मन ला अपन खेत म डबरी बनाए बर प्रोत्साहित करे जात हे। ए काम म जिला प्रशासन के संगे-संग औद्योगिक समूह मन के सहयोग घलो लेहे जात हे। ए डबरी मन ले भू-जल स्तर म बढ़ोतरी के संग किसान मन ला सिंचाई अउ मछली पालन जइसन अतरिक्त सुविधा मिलही।
मुख्यमंत्री ह कहिन के दूसर चरन म जम्मो जल संरचना मन के जियोटैगिंग, ग्राम पंचायत मन के वॉटर बजट अउ जल सुरक्षा योजना मन के निर्माण म घलो बिसेस ध्यान दे जाही। संग म गाँव के जवान मन ला “जल मित्र” के रूप म ट्रेनिंग दे जाही, ताकि अभियान ला गति मिल सके। मुख्यमंत्री ह साफ करीन के क्रिटिकल अउ सेमी-क्रिटिकल ब्लॉक मन म बिसेस फोकस राखत हुए सेमी-क्रिटिकल ब्लॉक म 40 प्रतिशत अउ क्रिटिकल ब्लॉक म 65 प्रतिशत जल संरक्षण काम के लक्ष्य रखे गे हे। उमन प्रदेशवासी मन ले जल संरक्षण ला अपन दिनचर्या के हिस्सा बनाए, जल संरचना मन के रक्षा करे अउ जल के प्रति जिम्मेदार सोच अपनाए के गोहरा घलो करीन।
केंद्रीय जल शक्ति मंत्री श्री सी. आर. पाटिल ह छत्तीसगढ़ म जल संरक्षण के क्षेत्र म होवत काम अउ नवाचार मन के सराहना करिन। उमन कहिन के पाछू बछर जल संरक्षण के कोसिस म छत्तीसगढ़ देसभर म दूसरा नंबर म रहिस, जेहा राज्य बर गरब के बात हे। उमन कहिन के प्रधानमंत्री श्री नरेंद्र मोदी ह सितंबर 2024 म सूरत ले ‘जल संचय जन भागीदारी अभियान’ के सुरुवात करे रहिन अउ ‘कर्मभूमि ले मातृभूमि बर जल संचयन म सहयोग’ के आह्वान करे रहिन। ए अभियान के मकसद जल संरक्षण ला जनआंदोलन के रूप देना हे।
केंद्रीय मंत्री श्री पाटिल ह प्रदेश के जम्मो कलेक्टर मन ले मनरेगा के तहत जल संचय काम बर मिले रकम के पूरा अउ सही उपयोग सुनिश्चित करे बर कहिन। उमन राजनांदगांव प्रवास के दौरान एक महिला सरपंच कोति ले स्वयं के कोसिस ले जल संचयन बर करे गे बने काम के तारीफ करीन। एकर संगेच उमन जल संचय म जादा ले जादा जनभागीदारी बढ़ाए बर जोर दीन।
बैठक म मुख्यमंत्री के प्रमुख सचिव श्री सुबोध कुमार सिंह, जल संसाधन विभाग के सचिव श्री राजेश सुकुमार टोप्पो अउ जल शक्ति मंत्रालय, भारत सरकार के सचिव श्री कांताराव अउ छत्तीसगढ़ के जम्मो कलेक्टर वर्चुअली उपस्थित रहिन।