शुभ घड़ी आईस, साय कैबिनेट ह अयोध्या धाम म करिस श्रीरामलला के दर्शन
मुख्यमंत्री बोलिन आज जीवन के बड़का दिन, हम सबके सौभाग्य के रामलला के दर्शन के पुण्य लाभ ले सकेन
उपहार म शबरी माता के भुइंया शिवरीनारायण ले बोइर अउ जल, सीताफल, विष्णु भोग के चाउंर, अइरसा अउ करी लाडू अउ कोसा के कपड़ा भेंट करिन
रायपुर, 13 जुलाई 2024। अयोध्या धाम म पवित्र राम जन्मभूमि म श्री रामलला के दर्शन बर जइसनहेच मुख्यमंत्री श्री विष्णु देव साय अऊ ऊंखर कैबिनेट के सहयोगी पहुंचिन। पूरा मंदिर परिसर म नारा गूंज उठिस। छत्तीसगढ़ के भांचा राम, जय श्री राम, जय श्री राम। अइसनहे पूरा परिसर राम भक्ति के माहौल म, ननिहाल ले आए भक्त मन के स्नेह सिक्त वाणी ले गुंजायमान हो गीस। जइसे माता शबरी के शिवरीनारायण म भगवान श्री राम के पुण्य दर्शन के इच्छा पूरा होए रहिस। उही साध ननिहाल के हर राम भक्त ल होथे। वइसनहे मुख्यमंत्री श्री विष्णु देव साय अऊ उंखर कैबिनेट के घलोक रामलला के दर्शन के इच्छा आज पूरा हो गे। मुख्यमंत्री श्री विष्णु देव साय संग ऊंखर कैबिनेट के सदस्य मन ह आज अयोध्या धाम पहुंचके श्रीरामलला के दर्शन करिस। मुख्यमंत्री ह ए मौका म भाँचा राम के ननिहाल के उपहार घलोक प्रभु के चरण म अर्पित करिन। उमन छत्तीसगढ़ ले शबरी माता के भुइंया शिवरीनारायण ले बोइर अउ पवित्र जल, विष्णु भोग के चाउंर, अइरसा, करी लाडू अउ कोसा के कपड़ा प्रभु ल अर्पित करिन।
मुख्यमंत्री श्री साय ह ए अवसर म प्रभु श्री राम ले छत्तीसगढ़ के मनखे मन के सुख समृद्धि के कामना करिन। ए मौका म मुख्यमंत्री ह कहिन कि हमन पूरा कैबिनेट के संग श्री रामलला के दर्शन बर आज अयोध्या धाम आए हन। भगवान श्रीराम हमार छत्तीसगढ़ के भांचा ये। भांचा राम के दर्शन बर हमन बड़ उत्सुक रहेन। भगवान श्रीराम के आशीर्वाद ले वो शुभ घड़ी आगे हे जब हमन ल अयोध्या धाम म रामलला के दर्शन के सौभाग्य मिलीस।
ए मौका म मुख्यमंत्री के कैबिनेट के सहयोगी उपमुख्यमंत्री श्री अरुण साव, श्री विजय शर्मा, कृषि मंत्री श्री राम विचार नेताम, वन मंत्री श्री केदार कश्यप, खाद्य मंत्री श्री दयाल दास बघेल, स्वास्थ्य मंत्री श्री श्याम बिहारी जायसवाल, वित्त मंत्री श्री ओपी चौधरी, श्रम मंत्री श्री लखन लाल देवांगन, महिला अउ बाल विकास मंत्री श्रीमती लक्ष्मी राजवाड़े, खेल मंत्री श्री टंक राम वर्मा घलोक मौजूद रहिन। एखर संगेच श्री किरण देव, श्री अजय जामवाल अउ श्री पवन साय घलोक मौजूद रहिन।
