किसान मन के हित म केंद्र सरकार के बड़का फैसला: दलहन अउ तिलहन उत्पादन ल मिलही बढ़ावा
किसान मन के हित के सुरक्षा हमर पहली प्राथमिकता – मुख्यमंत्री श्री विष्णुदेव साय
रायपुर, भारत सरकार के ग्रामीण विकास अउ कृषि एवं किसान कल्यान मंत्री श्री शिवराज सिंह चौहान ह मुख्यमंत्री श्री विष्णु देव साय ल चिट्ठी लिख के बताय हवय के खरीफ विपणन साल 2025-26 के दौरान छत्तीसगढ़ म दाल अउ तिलहनी फसल मन के खरीदी बर मूल्य समर्थन योजना (PSS) लागू करे के राज्य सरकार के प्रस्ताव ल मंजूरी दे देहे गए हे।
केंद्रीय मंत्री के भेजे चिट्ठी के मुताबिक छत्तीसगढ़ म ए फसल मन के न्यूनतम समर्थन मूल्य (MSP) म 21 हजार 330 मीट्रिक टन तुअर, 25 हजार 530 मीट्रिक टन उड़द, 240 मीट्रिक टन मूंग, 4 हजार 210 मीट्रिक टन सोयाबीन अउ 4 हजार 210 मीट्रिक टन फल्ली (मूंगफली) बिसाए के मंजूरी मिले हे।
ए फसल मन के खरीदी मूल्य समर्थन योजना के तहत न्यूनतम समर्थन मूल्य (MSP) म करे जाही, जेखर ले किसान मन ल ओखर उपज के सही दाम मिलही। केंद्रीय मंत्री श्री शिवराज सिंह चौहान ह अपन चिट्ठी म उम्मींद जताय हें के ए फैसला ले तुअर, उड़द, मूंग, सोयाबीन अउ फल्ली उपजइया किसान मन ल बड़का राहत मिलही अउ ओमन ल औने-पौने दाम म फसल बेंचे बर मजबूर नइ होना परही।
मुख्यमंत्री श्री विष्णु देव साय ह केंद्र सरकार के ए फैसला बर आभार जतावत कहिन के प्रधानमंत्री श्री नरेंद्र मोदी के नेतृत्व म किसान मन के हित के सुरक्षा हमर सबले बड़का प्राथमिकता हरय। उमन कहिन के राज्य सरकार एमएसपी म खरीदी के सबो तैयारी ल समय म पूरा करके किसान मन ल जादा ले जादा फायदा पहुंचाही। ए फैसला ले प्रदेश के किसान मन ल आर्थिक सुरक्षा मिलही, दलहन अउ तिलहन उत्पादन ल बढ़ावा मिलही अउ गांव-देहात के अर्थव्यवस्था मजबूत होही।