रायपुर, जड़ी-बूटी औषधीय अउ सुगंधित पौधा मन के खेती म किसान मन के रूचि तेजी ले बाढ़े हे। एखर असल कारन परम्परागत फसल के तुलना म जादा मुनाफा, कम लागत अउ बाजार म भारी मांग आय। अश्वगंधा, लेमनग्रास, तुलसी अउ खस जइसे फसल ले किसान मन हर एकड़ बनेच कमाई करत हें, जेमा सरकार के सब्सिडी अउ तकनीकी मदद घलो काम आवत हे।
जड़ी-बूटी अउ सुगंधित पौधा के खेती ला बढ़ावा
छत्तीसगढ़ युवा प्रगतिशील किसान संघ कोति ले आयोजित किसान मेला म ‘छत्तीसगढ़ आदिवासी, स्थानीय स्वास्थ्य परंपरा एवं औषधि पादप बोर्ड’ ह बढ़-चढ़ के हिस्सा लीस। कुम्हारी, दुर्ग म 30-31 जनवरी के आयोजित दू दिन के किसान मेला म बोर्ड डाहर ले लगाय गे स्टॉल के माध्यम ले औषधीय अउ सुगंधित पौधा के खेती ला बढ़ावा दे बर चलत सरकारी योजना अउ काम मन के जानकारी देहे गीस।
ए कार्यक्रम म केन्द्रीय कृषि मंत्री श्री शिवराज सिंह चौहान, मुख्यमंत्री श्री विष्णुदेव साय, उपमुख्यमंत्री श्री विजय शर्मा, कृषि मंत्री श्री रामविचार नेताम, वन मंत्री श्री केदार कश्यप, वित्त मंत्री श्री ओ.पी. चौधरी, शिक्षा मंत्री श्री गजेन्द्र यादव, सांसद दुर्ग श्री विजय बघेल के संग कृषि अउ दूसर विभाग के बड़े अधिकारी मन उपस्थित रहिन।
किसान मन बर खास आकर्षण के केंद्र: लेमनग्रास के खेती
स्टॉल म अलग-अलग सुग्घर मॉडल के माध्यम ले खेती के सफल उदाहरण देखाए गीस। जेमा नदी तीर के रेतहा कछरहूं अउ बेकार परे जमीन म खस के खेती, महिला मन ला आत्मनिर्भर बनाय बर घर के बाड़ी म सिंदूरी, सतावर अउ ब्राह्मी लगाय अउ धान के खेती के संग लेमनग्रास के खेती के ‘मिनिएचर मॉडल’ सामिल रहिन। ए मॉडल मन किसान अउ आम मनखे मन बर खास आकर्षण के केंद्र बनिन।
जड़ी-बूटी अउ सुगंधित पौधा मच्छर अउ कीरा-मकोरा भगाए म सहायक
बता दन के ए किसान मेला म बोर्ड कोति ले जड़ी-बूटी अउ सुगंधित पौधा ले बने समान मन ला मुफत म बाँटे गीस। अनंतमूल के जड़ ले बने ‘नन्नारी शरबत’ किसान अउ आम मनखे मन ला पियाए गीस, जेहा सरीर ला भीतर ले ठंढक पहुँचाथे अउ घाम ले बचाए म मदद करथे।
एखर संगेच लेमनग्रास तेल के 10 मि.ली. के सीसी मन ला मुफत म बाँटे गीस। लेमनग्रास तेल के उपयोग मन के सांति, सुगंधित वातावरण बनाय, मच्छर अउ कीरा-मकोरा मन ला भगाय अउ तेल म मिला के मालिश करे बर करे जाथे। किसान मेला म लगभग 1000 ले 1500 किसान अउ आम मनखे मन बोर्ड के स्टॉल ले जानकारी लीन अउ नन्नारी शरबत अउ लेमनग्रास तेल के फायदा के बारे म जानिन।