- नई दिल्ली म आयोजित कार्यशाला म श्रेष्ठ काम मन के होइस प्रस्तुति
- भानपुरी के सरपंच अऊ स्वसहायता समूह के महिला ह साझा करिन अपन अनुभव
रायपुर, छत्तीसगढ़ म रूर्बन मिशन के तहत होत काम मन ल एक पइत फेर राष्ट्रीय स्तर म सराहना मिले हे। मिशन के काम मन के अनुभव ल साझा करे हाले च म 24 जून के दिन नई दिल्ली म आयोजित राष्ट्रीय कार्यशाला म प्रदेश म होवत काम मन उपर प्रस्तुति दिये गीस। केन्द्रीय ग्रामीण विकास अउ पंचायतीराज मंत्री श्री नरेन्द्र सिंह तोमर अऊ ग्रामीण विकास राज्य मंत्री साध्वी निरंजन ज्योति घलोक कार्यशाला म सामिल होइन। ग्रामीण विकास मंत्रालय के अधिकारी मन अउ देश भर ले आए जनप्रतिनिधि मन ह रूर्बन मिशन के अंतर्गत इहां होवत अधोसंरचना विकास अऊ रोजगारमूलक काम मन के खुले दिल ले तारीफ करिन। कार्यशाला म क्लस्टर मन बर तियार करे जात मास्टर प्लान (विकास योजना) के प्रक्रिया अउ प्रगति के बारे म घलोक जानकारी दिए गीस।
केन्द्रीय ग्रामीण विकास मंत्रालय कोति ले आयोजित राष्ट्रीय रूर्बन मिशन के ये एक दिवसीय कार्यशाला म धमतरी जिला के लोहरसी क्लस्टर के अंतर्गत ग्राम पंचायत भानपुरी के सरंपच श्रीमती उत्तरा साहू अऊ राष्ट्रीय ग्रामीण आजीविका मिशन के तहत गठित स्वसहायता समूह के सदस्य श्रीमती वीणा साहू ह मिशन के तहत होए ले उहां आवत सकारात्मक बदलाव के बारे म अनुभव साझा करिन। कार्यशाला म आंध्रप्रदेश, तमिलनाडू, गुजरात, उत्तरप्रदेश, मिजोरम, पंजाब, महाराष्ट्र, राजस्थान, झारखंड, तेलंगाना, उत्तराखंड, केरल, नागालैंड, कर्नाटक, हरियाणा अऊ मध्यप्रदेश के प्रतिनिधि मन ह घलोक अपन अनुभव साझा करिन। कार्यशाला म देश भर के 80 निर्वाचित जनप्रतिनिधि मन अऊ 275 प्रतिनिधि मन ह हिस्सा लीन।
राष्ट्रीय कार्यशाला म छत्तीसगढ़ कोति ले लोहरसी क्लस्टर म होत काम मन के अनुभव साझा करे। एक्वाडक्ट कोति ले सिंचित रकबा म वृद्धि, सुसज्जित अउ सुव्यवस्थित हाट-बाजार, इंजेक्शन वेल निर्माण, तालाब सौंदर्यीकरण, आदर्श आंगनबाड़ी, ठोस अपशिष्ट प्रबंधन, ई-रिक्शा ले आजीविका अऊ जैविक कृषि दुकान जइसे काम मन ले रोजगार के अवसर म होए बढ़ोतरी अऊ अधोसंरचना विकास के बारे म जानकारी दिए गीस।
