मुख्यमंत्री ह छत्तीसगढ़ महतारी के प्रतिमा ऊपर फूल माला चढ़ा के करिन पैलगी

छत्तीसगढ़ महतारी के असीस ले प्रदेश के विकास के खाइन किरिया
छत्तीसगढ़ राज्य स्थापना दिवस म छत्तीसगढ़ महतारी के पूजा-अर्चना कर प्रदेशवासी मन के खुशहाली के करिन कामना
रायपुर, छत्तीसगढ़ राज्य स्थापना के 25 साल पूरा होए के ऐतिहासिक अवसर म आज मुख्यमंत्री श्री विष्णु देव साय ह राजधानी रायपुर स्थित कलेक्ट्रेट परिसर म छत्तीसगढ़ महतारी के प्रतिमा म ऊपर फूल माला चढ़ा के ऊंखर पैलगी करिन। उमन प्रदेशवासी मन के सुख-समृद्धि, खुशहाली अऊ सर्वांगीण विकास के कामना करिन।
मुख्यमंत्री श्री साय ह छत्तीसगढ़ के पारंपरिक लोक संस्कृति के मुताबिक पूजा-अर्चना करके राज्य के धरोहर, संस्कृति, मातृशक्ति अऊ स्वाभिमान के चिन्हारी छत्तीसगढ़ महतारी ल नमन करिन। उमन कहिन के छत्तीसगढ़ महतारी हमर अस्मिता, आस्था अऊ गर्व के चिन्हारी ये।
मुख्यमंत्री श्री साय ह कहिन कि ये वाले भुइँया मातृशक्ति के आराधना वाले भुइँया ये अऊ छत्तीसगढ़ महतारी के आशीर्वाद ले ही प्रदेश सरलग प्रगति के रद्दा म आगू बढ़त हे। उमन प्रदेशवासी मन ल राज्योत्सव के शुभकामना देवत कहिन के राज्य सरकार प्रदेश के एकमई विकास बर बाना उँचाये हे। राज्य सरकार आम जनता के जीवनस्तर म सुधार, महिला सशक्तिकरण, कृषि विकास, युवा मन ल रोजगार, आदिवासी समाज के उन्नति अऊ सांस्कृतिक संरक्षण बर बहुत अकन योजना संचालित करत हे।

मुख्यमंत्री श्री साय ह कहिन के रजत जयंती साल प्रदेश बर नवा ऊर्जा अऊ संकल्प के चिनहा हे। आज के दिन विशेष रूप ले गौरव के क्षण हे, काबर के प्रधानमंत्री श्री नरेंद्र मोदी के आज छत्तीसगढ़ आगमन हे अऊ राज्य स्थापना दिवस म बहुत अकन ऐतिहासिक कार्यक्रम होवइया हे। मुख्यमंत्री श्री साय ह कहिन के छत्तीसगढ़ महतारी के आशीर्वाद ले अवइया समय म प्रदेश निश्चित ही देश के अग्रणी अऊ समृद्ध राज्य मन म अपन सशक्त पहिचान स्थापित करही। ए बेरा म विधायक श्री पुरंदर मिश्रा संग गणमान्य नागरिक अऊ प्रबुद्धजन उपस्थित रहिन।